Read Caribbean Javanese Wulang Bebasan 22 Bible Online

Wulang Bebasan 22 - Caribbean Javanese bible

Wulang Bebasan 22

¹Jeneng apik kuwi luwih betyik tenimbangané karo kasugihan gedé, luwih betyik nampani katrésnan tenimbang olèh slaka lan emas.

²Wong sugih lan wong mlarat pada ketemu, loro-loroné GUSTI sing nggawé.

³Wong wityaksana yèn weruh anané tyilaka, terus ndelik, nanging wong ora nduwé pengalaman terus waé mlakuné, nganti ngalami kasangsarané.

⁴Andap-asor lan ngabekti marang GUSTI kuwi diberkahi, kasugihan, kaluhuran lan urip.

⁵Eri lan jiret ing dalané wong sing atiné lityik, sapa sing kepéngin njaga awaké, kuwi ngedohi wong mau.

⁶Wong enom kuwi wulangana miturut dalan sing tyotyok kanggo dèwèké, yèn wis tuwa ora bakal nyimpang sangka dalan kuwi.

⁷Wong sugih ngwasani wong mlarat, lan sapa sing utang, dadi baturé sing motangaké.

⁸Wong sing nyebar ala bakal panèn tyilaka, nganti tekené nesuné bakal lebur.

⁹Wong betyik ati kuwi bakal kaberkahan, awit wong mlarat pada dipandumi rejekiné.

¹⁰Wong memoyok kuwi tundungen, mesti tukaran terus ilang, lan sing pada padu lan nyalahké pada lèrèn.

¹¹Sapa sing seneng marang resiké ati, lan alus tetembungané, kuwi dadi kantyané ratu.

¹²Mripaté GUSTI njaga marang kaweruh, nanging tembungé wong goroh diwurungké.

¹³Tembungé wong males: “Ing njaba ana singa, aku arep dipatèni ing tengah dalan.”

¹⁴Tembungé wong wadon lonté kuwi juglangan sing jeru, sapa sing kena bebenduné GUSTI kuwi bakal ketyemplung ing kono.

¹⁵Kebodoan kuwi nèmplèk ing atiné wong enom, nanging tekené piwulang sing bakal ngilangké kuwi.

¹⁶Sapa sing nindes marang wong ringkih murih olèh untungé kanggo awaké déwé, utawa sing pawèh marang wong sugih, kuwi ndadèkké kalahé déwé.

¹⁷Pasangen kupingmu, rungokna tembungé para wong wityaksana, lan gatèkna sak kabèhé kaweruhku.

¹⁸Awit yèn kuwi kok rumati ing sak njeruhné ati bakal nggawé senengmu, yèn kabèh kuwi tyumawis ing lambému.

¹⁹Supaya kowé nduwéa pengandel marang GUSTI, saiki pitutur mau tak wulangké marang kowé, ya marang kowé déwé.

²⁰Aku mbiyèn apa ora wis nulis marang kowé, tak wulangi pitutur lan kaweruh,

²¹kanggo mulangi marang kowé apa sing bener lan nyata, supaya kowé bisa nyauri karo titis marang sing ngongkon kowé.

²²Aja ngrampasi wong mlarat, awit kuwi wis mlarat, lan aja nindes wong sing susah ing gapura.

²³Awit GUSTI mbélani perkarané, lan sapa sing ngrampas marang wong mau, kuwi bakal direbut nyawané.

²⁴Aja kekantyan karo wong lengus, lan aja sesrawungan karo wong brangasan,

²⁵supaya kowé aja nganti kulina marang pertingkahé, lan dadi jiret kanggo awakmu déwé.

²⁶Kowé aja nganti mèlu wong nganakké rembukané, lan sing arep nanggung utang.

²⁷Yèn kowé déwé ora nduwé sing digawé nyaur, kenèng apa nganti ambèn sing kok turoni dijukuk wong?

²⁸Aja ngelih patoké wates lemah sing lawas, sing wis ditetepaké karo para leluhurmu.

²⁹Apa kowé wis tau weruh wong sing sregep lan prigel ing gawé? Wong sing mengkono kuwi bakal ngadek ing ngarepé ratu, ora ngadek marang wong sing asor.