Read Caribbean Javanese Wulang Bebasan 23 Bible Online

Wulang Bebasan 23 - Caribbean Javanese bible

Wulang Bebasan 23

¹Yèn kowé mèlu mangan karo penggedé, gatèkna tenan apa ing ngarepmu.

²Yèn kowé pantyèn wong murka, tèmplèkna péso ing gulumu.

³Aja mélék marang pangané sing énak-énak, awit kuwi pangan kanggo mblénjani.

⁴Aja ngaya karepmu supaya bisa dadi sugih, tinggalen karepmu sing mengkono kuwi;

⁵awit yèn kok gatèkké, kuwi terus entèk, awit kuwi dadakan nganggo swiwi kaya manuk garuda sing terus mabur menyang langit.

⁶Aja mangan pangané wong tyetil, lan aja péngin marang pangané sing énak-énak,

⁷awit kaya wong sing ngitung-itung ing sak njeruhné atiné, ya kaya mengkono kuwi wong mau. Semauré marang kowé: “Mangana lan ngombéa!” Nanging atiné ora seneng marang kowé.

⁸Sak emplokan olèhmu mangan bakal kok utahké, lan kabèh tembungmu sing alus kuwi kok buwang tanpa guna.

⁹Aja guneman ing ngarepé wong bodo, awit kuwi bakal ngrèmèhké omonganmu sing titis.

¹⁰Aja ngelih patok watesé lemah sing lawas, lan aja mlebu ing tegalé botyah lola.

¹¹Awit sing nebus kuwi kuwat, Gusti Allah sing mbélani perkarané nglawan marang kowé.

¹²Gatèkna marang piwulangan, lan kupingmu rungokna marang tembung-tembung sing isi kaweruh.

¹³Aja nglalèkké piwulang marang anak, kuwi yèn kok sabet nganggo penjalin ora ndadèkké patiné.

¹⁴Kowé nyabet nganggo penjalin, nanging kowé ngentasaké nyawané sangka ndonyané wong mati.

¹⁵Hé anakku, yèn atimu wityaksana, kuwi ya ndadèkké bungahé atiku.

¹⁶Nyawaku bungah-bungah, yèn lambému ngutyapké sing jujur.

¹⁷Atimu aja mèri marang para wong dosa, nanging tansah mantepa enggonmu ngabekti marang GUSTI.

¹⁸Sak temené pengarep-arep kuwi pantyèn ana, lan pengarep-arepmu ora bakal ilang.

¹⁹Hé anakku, rungokna, lan dadia wityaksana, atimu tujokna ing dalan sing bener.

²⁰Aja sesrawungan karo wong sing kesenengané ngombé anggur, lan sing kesenengané marang daging;

²¹awit wong kesenengané ngombé lan seneng mangan kuwi bakal nemoni mlarat, lan ngantuk terus njalari urip ketula-tula.

²²Rungokna tembungé bapakmu sing nganakké kowé, lan aja nyepèlèkké ibumu yèn wis tuwa.

²³Tukua kabeneran lan aja kok edol menèh, mengkono uga kawityaksanan, piwulang lan kapinteran.

²⁴Bapakné wong sing bener kuwi bakal bungah-bungah, lan sapa sing nglairké wong wityaksana kuwi bakal bungah-bungah.

²⁵Bèn bapak lan ibumu pada bungah, lan sing nglairké kowé bèn surak-surak.

²⁶Hé anakku, atimu kèkna marang aku, lan mripatmu bèn seneng marang dalan-dalanku.

²⁷Awit wong wadon lonté kuwi juglangan sing jeru, lan wong wadon mantya kuwi sumur sing tyiut.

²⁸Malah kaya rampok enggoné nyegat, lan ngakèhké wong sing goroh ing antarané para manungsa.

²⁹Sapa sing ngaduh-aduh? Sapa sing sambat-sambat? Sapa sing padu? Sapa sing nggresah-nggresah? Sapa sing tatu tanpa sebab? Sapa sing mripaté abang?

³⁰Ya kuwi para sing melèk nganti tengah wengi karo ngombé anggur, sing pada teka perlu ngityipi anggur sing dityampuri.

³¹Aja mandeng marang anggur, sing abang mingini banget rupané, lan nyenengké ing tuwung, lan angler énaké yèn diombé,

³²nanging pungkasané nyokot kaya ula, lan nyemburké ratyun kaya ula upas.

³³Mripatmu terus bakal weruh bab sing anèh, lan atimu ngetokké tembung-tembung sing ora karuan.

³⁴Kowé terus kaya wong ing sak tengahé ombaké segara, utawa kaya wong ing putyuké tyagaké kapal.

³⁵Kowé bakal ngomong mengkéné: “Aku digebuki karo wong, nanging aku ora krasa lara, lan dipentungi, ya ora krasa! Kapan aku éling? Aku arep golèk anggur menèh.”