Read Caribbean Javanese Wulang Bebasan 24 Bible Online

Wulang Bebasan 24 - Caribbean Javanese bible

Wulang Bebasan 24

¹Aja mèri marang wong ala, lan aja sesrawungan karo wong kuwi;

²awit atiné tansah ngréka-ngréka arep nglarani, lan lambéné ngomongké bab kasangsarané.

³Karo kawityaksanan omah kuwi diedekaké, lan dikuwatké karo kapinteran;

⁴lan karo kapinteran kamar-kamaré pada diisèni, banda werna-werna sing larang regané lan sing nyenengké.

⁵Wong wityaksana kuwi kuwat, wong sing nduwé kaweruh ya luwih kuwat.

⁶Awit mung karo rantyaman enggonmu bisa ngluruk perang, lan kemenangan kuwi gumantung okèhé wong sing dadi juru rembuk.

⁷Kawityaksanan kuwi keduwuren kanggo wong bodo, mulané ing gapura ora mbukak tutuké.

⁸Sapa sing tansah ngrantyam sing ala, bakal diarani tukang ngapusi.

⁹Mikir kebodoan kuwi ndadèkké dosa, lan wong seneng memoyok kuwi ala kanggo manungsa.

¹⁰Yèn ing dina kangèlan atimu semplak, kuwi nyatakké kurangé kekuwatanmu.

¹¹Wong sing diglandang arep dipatèni kuwi slametna, lan sing gloyoran marani panggonan penyembelèhan, kuwi slametna.

¹²Yèn kowé omong: “Perkara kuwi aku ora ngerti tenan!” Gusti Allah sing nguji ati apa ora ngerti ing sejatiné? Apa Panjenengané sing njaga nyawamu kuwi ora ngerti, lan mbales marang manungsa miturut penggawéné?

¹³Hé anakku, mangana madu, awit kuwi betyik, lan rembesé madu kuwi legi rasané ing tyetakmu.

¹⁴Ngertènana, kaya mengkono rasané kawityaksanan kanggo nyawamu, yèn kok temu sing kok arep-arep ing dina mburiné, lan pengarep-arepmu ora bakal ilang.

¹⁵Aja ngintyeng panggonané wong bener kaya mlakuné wong duraka, aja ngrusak omahé.

¹⁶Awit wong bener kuwi tiba dibalèni kaping pitu, mesti ngadek menèh, nanging wong duraka bakal ambruk ing sak njeruhné tyilaka.

¹⁷Yèn mungsuhmu tiba, aja bungah, lan yèn dèkné kejlungup aja bungah-bungah atimu,

¹⁸supaya GUSTI ora weruh lan nganggep ala, terus nyingkirké bebenduné sangka wong mau.

¹⁹Aja nesoni marang wong sing nindakké sing ala, aja mèri marang wong duraka.

²⁰Awit ora ana pengarep-arep kanggo wong ala, dimaré wong duraka kuwi bakal mati.

²¹Hé anakku, wedia lan trésnaa marang GUSTI lan marang ratu, aja mbruntak marang loro-loroné.

²²Awit dadakan waé pada nekakké kasangsarané, lan sapa ngerti leburé, sing ditekakké karo loro-loroné?

²³Iki ya wulang bebasan panemuné para wityaksana, nyawang wong ing pengadilan kuwi ora apik.

²⁴Sapa sing ngomong marang wong duraka: “Kowé ora salah,” kuwi bakal disepatani karo para bangsa, lan disepatani karo para taleré bangsa.

²⁵Nanging sing ngekèki pepéling bakal nemu kabekjan, lan bakal olèh berkah.

²⁶Sapa sing nyauri karo titis, kuwi nyutyup lambé.

²⁷Penggawéanmu ing njaba rampungna, lan tyawisna kebonanmu, sakwisé kuwi terus ngedekna omahmu.

²⁸Aja dadi seksi kanggo pepadamu tanpa sebab, lan ngapusi karo lambému.

²⁹Aja nduwé tembung: “Kaya sing dadi penggawéné wong kuwi marang aku, ya kaya mengkono bakal tak tindakké marang wong mau. Aku mbales marang wong miturut penggawéné.”

³⁰Aku ngliwati tegalané wong males, lan ing kebon angguré wong sing tanpa pikiran.

³¹Lah kabèh kuwi kebak ketukulan eri, lemahé ketukulan karo eri, lan témboké wis ambruk.

³²Aku weruh terus njupuk piwulangé, aku weruh terus olèh wulangan.

³³“Turu sedilut engkas, ngantuk sedilut engkas, nekuk tangan sedilut engkas arep neruské lèyèh-lèyèh,”

³⁴terus katekan mlarat, kaya wong sing nyerang, katekan kekurangan, kaya wong sing nganggo gaman.