Read Caribbean Javanese Wulang Bebasan 25 Bible Online

Wulang Bebasan 25 - Caribbean Javanese bible

Wulang Bebasan 25

¹Iki uga wulang bebasan panemuné Salomo sing diklumpukké karo para abdiné Hiskia, ratu ing Yéhuda.

²Kaluhurané Gusti Allah kuwi kaya perkara sing kesimpen, nanging kaluhurané para ratu kuwi mriksa perkara.

³Sak pira duwuré langit lan jeroné bumi, kaya mengkono atiné para ratu kuwi enggoné ora kena dijajaki.

⁴Regeté slaka singkirna, mesti tukang emas bisa olèh barang sing digawé piranti sing apik.

⁵Wong duraka singkirna sangka ngarepé ratu, nganti damparé dikuwatké karo kabeneran.

⁶Aja pamèr ing ngarepé ratu, utawa ngadek ing panggonané para penggedé.

⁷Awit luwih betyik kowé dipréntah mengkéné: “Réné majua ing nduwur kéné!” Tenimbangané karo dikongkon mundur, karo sing luhur. Apa mripatmu weruh,

⁸aja kesusu enggonmu nggawé perkara ing pengadilan, awit ing pungkasané apa sing kena kok tindakké, yèn lawanmu wis ndadèkké wirangmu?

⁹Bélanana perkaramu karo sak pepadamu, nanging aja mbukak wewadiné liyané;

¹⁰supaya kowé aja nganti dirèmèhké karo sing pada krungu, nganti kewiranganmu ora bakal bisa ilang.

¹¹Tetembungan sing diutyapké tyotyok karo waktuné, kuwi upamané kaya apel emas ing piring slaka.

¹²Pawelèhé wong wityaksana kuwi kanggo kuping sing ngrungokké, kaya ali-ali emas utawa dandanan emas murni.

¹³Kaya anyepé salju ing waktu panèn, kaya mengkono kongkonan sing temen lan setia kanggo sing ngongkon, awit nyegerké atiné bendarané.

¹⁴Mendung lan angin sing tanpa udan, kaya mengkono kuwi wong sing ngumukké berkah sing ora tau diwènèhké.

¹⁵Para pangwasa bisa diyakinké karo kesabaran, ilat sing alus ngremukké balung.

¹⁶Yèn kowé olèh madu, mangana sak tyukupé, aja nganti kewareken, nganti terus kok utahké.

¹⁷Aja kekerepen medayoh ing omahé pepadamu, supaya wong kuwi aja nganti jelèh, terus sengit marang kowé.

¹⁸Wong ngetokké paseksi goroh kanggo sak pepadané, kuwi upamané kaya gepuk utawa pedang lan panah sing landep.

¹⁹Pengandel marang wong sing goroh ing waktu susahé, kuwi upamané kaya untu sing gapuk utawa kaya sikil sing kesléo.

²⁰Wong sing ngidungké kidungan kanggo ati sing sedih, kuwi upamané kaya wong sing nyopot klambi ing waktu bediding, utawa sing ngesokké tyukak ing tatu.

²¹Yèn mungsuhmu kaliren, wènèhana mangan roti, yèn ngelak, wènèhana ngombé banyu:

²²awit kowé bakal numpangi mawa geni ing sirahé, lan GUSTI bakal mbales marang kowé.

²³Angin sangka lor nggawa udan, guneman bisik-bisik, praupan mrengut.

²⁴Luwih betyik manggon ing pojok payon, tenimbangané manggon sak omah karo wong wadon sing seneng tukaran.

²⁵Kabar betyik sangka negara adoh kuwi, kaya banyu adem kanggo nyawa sing ngelak.

²⁶Wong bener sing wedi ing ngarepé wong duraka, kuwi kaya sumber butek utawa sumber sing reget.

²⁷Ora apik mangan madu okèh kuwi; mulané aja kokèhan enggonmu ngetokké tembung pengalem.

²⁸Wong sing ora bisa ngendalèni awaké, kuwi kaya kuta sing ambruk témboké.