Read Caribbean Javanese Wulang Bebasan 28 Bible Online

Wulang Bebasan 28 - Caribbean Javanese bible

Wulang Bebasan 28

¹Wong duraka mblayu senajan ora ana sing ngoyak-oyak, nanging wong bener rumangsa tentrem kaya singa nom.

²Awit sangka pambruntakan ing sakwijiné negara, okèh sing nyekel pangwasa, senajan mengkono sangka anané wong sing nduwé pikiran lan kanggonan kaweruh, angger-angger tetep ana.

³Wong mlarat sing nindes wong mlarat, kuwi kaya udan deres, nanging ora ngekèki rejeki.

⁴Para wong sing nyepèlèkké angger-angger, kuwi pada ngelem marang wong duraka, nanging sing netepi angger-angger pada nglawan marang wong sing mengkono kuwi.

⁵Wong ala ora ngerti adil, nanging wong sing nggolèki GUSTI kuwi ngerti samubarang.

⁶Betyik wong mlarat sing watekké resik, tenimbangané wong lityik, senajan sugih.

⁷Sapa sing netepi angger-angger kuwi anak sing pinter, nanging sing sesrawungan karo wong sing murka kuwi nggawé isiné bapaké.

⁸Sapa sing nambahi bandané karo ngeruk bati lan dianakké sak okèhé, kuwi nglumpukké banda kanggo wong-wong sing melasi marang wong mlarat.

⁹Sapa sing ngénggokké kupingé emoh ngrungokké angger-angger, pandongané njijiki kanggo Gusti.

¹⁰Sapa sing nasarké wong jujur ing dalan sing ala, kuwi bakal dityemplungké ing juglangané déwé, nanging wong sing resik atiné bakal olèh warisan kabekjan.

¹¹Wong sugih rumangsa pinter, nanging wong mlarat sing nduwé kaweruh ngerti sapa wong sugih mau.

¹²Yèn wong bener menang, okèh sing ngelem-elem, nanging yèn wong duraka olèh pangwasa, okèh wong sing pada ndelik.

¹³Sapa sing ndelikké dosané ora bakal beja, nanging sing ngakoni lan ninggalké kuwi olèh kawelasané Gusti.

¹⁴Rahayu wong sing tansah wedi lan ngajèni marang GUSTI, nanging wong sing wangkot bakal tiba ing tyilaka.

¹⁵Kaya singa sing nggeruh utawa bruwang sing nubruk, ya kaya mengkono kuwi wong duraka sing ngwasani rayat sing ringkih.

¹⁶Pemimpin sing tyupet pikirané kuwi abot penindesé, nanging sing sengit marang bati sing ora sah kuwi dawa umuré.

¹⁷Wong sing nanggung getihé wong liyané, kuwi bakal terus digawa mlayu tekan ing juglangan kubur. Aja kok éman!

¹⁸Sapa sing mlakuné tanpa tyiri, kuwi bakal ditulungi, nanging sing plintat-plintut bakal tiba ing juglangan.

¹⁹Wong sing ngolah lemahé bakal warek rejekiné, nanging sing ngoyak sembarang sing tanpa guna kuwi bakal warek karo kemlaratan.

²⁰Wong kena dipertyaya kuwi kalubèran berkah, nanging wong sing kepéngin gelis sugih, ora bakal utyul sangka paukuman.

²¹Nyawang lan mbédakké wong kuwi ora betyik, nanging ana wong sing nindakké panerak mung supaya olèh roti sak iris.

²²Wong sing tyetil péngin gelis sugih, lan ora weruh yèn bakal ngalami kekurangan.

²³Sapa sing melèhké marang wong, kuwi pungkasané luwih disenengi, tenimbangané sing nduwé ilat mung kanggo nggunggung.

²⁴Sapa sing ngrampas duwèké bapak utawa ibuné, lan nduwé pangira, yèn kuwi duduk panerak, wong kuwi déwé dadi kantyané tukang ngrusak.

²⁵Wong murka kuwi njalari tukaran, nanging sapa sing pertyaya marang GUSTI kuwi nampani kalubèran.

²⁶Sapa sing ngendelké atiné déwé kuwi wong bodo, nanging wong sing mlakuné karo kawityaksanan bakal slamet.

²⁷Sapa sing pawèh marang wong mlarat ora bakal kekurangan, nanging sing nutupké mripaté bakal kena bebendu.

²⁸Yèn wong duraka olèh pangwasa, wong okèh pada ndelik, nanging yèn wong duraka entèk, para wong bener mundak okèh.