Read Caribbean Javanese Wulang Bebasan 29 Bible Online

Wulang Bebasan 29 - Caribbean Javanese bible

Wulang Bebasan 29

¹Wong sing ngakokké gitoké, senajan wis diwelèhké, kuwi bakal diremuk dadakan lan ora bisa dipulihké menèh.

²Yèn tyatyahé wong bener mundak okèh, rayat bungah, nanging yèn wong duraka nyekel pangwasa, rayat sambat.

³Wong sing trésna marang kawityaksanan, kuwi ndadèkké bungahé bapaké, nanging sing sesrawungan karo wong wadon lonté kuwi ngèbrèh-èbrèh bandané.

⁴Karo keadilan ratu enggoné nguwatké negarané, nanging sing kakèhan enggoné narik pajek ndadèkké ambruké.

⁵Sapa sing seneng ndilat-ndilat marang pepadané, kuwi masang jiret ing ngarepé sikilé déwé.

⁶Wong sing ala kejiret karo paneraké déwé, nanging wong bener kuwi bakal bungah-bungah lan seneng-seneng.

⁷Wong bener ngakoni wewenangé wong mlarat, nanging wong duraka pada ora ngerti.

⁸Wong sing seneng memoyok mbingungké kuta, nanging wong wityaksana pada nentremaké nesu.

⁹Wong wityaksana yèn perkaran karo wong bodo, wong bodo mau ngamuk lan ngguyu, nganti ramé.

¹⁰Wong sing ngelak marang kutahé getih, pada sengit marang wong sutyi, nanging wong jujur pada nggolèki keslametané.

¹¹Wong bodo nguja sak kabèhé nesuné, nanging pungkasané wong wityaksana sing nentremaké.

¹²Yèn wong sing mréntah ngrungokké tembung ngapus, para pegawéné pada dadi wong duraka.

¹³Wong mlarat lan wong sing nindes pada petukan, wong loro kuwi pada dipadangké mripaté karo GUSTI.

¹⁴Ratu sing ngadili wong mlarat karo adil, kuwi damparé tetep kuwat ing sak lawas-lawasé.

¹⁵Gebuk lan pamelèh ngekèki kawityaksanan, nanging anak sing dijarké waé kuwi nggawé wirangé ibuné.

¹⁶Yèn tyatyahé wong duraka mundak, panerak ya mundak okèh, nanging para wong bener bakal pada weruh ambruké wong duraka kuwi.

¹⁷Anakmu wulangana, nganti bakal ndadèkké ayemé atimu, malah ngekèki kabungahan marang nyawamu.

¹⁸Yèn ora ana kaweruh, rayat dadi urakan, rahayu wong sing netepi angger-angger.

¹⁹Réwang ora bisa diélingké mung karo tembung tok, awit senajan ngerti, nanging ora nindakké.

²⁰Kowé weruh wong sing gampang ngetokké tetembungan; wong bodo pengarep-arepé luwih okèh tenimbang wong kuwi.

²¹Sapa sing nguja réwangé wiwit nom, pungkasané malah ndadèkké réwang mau ndablek.

²²Wong sing gampang nesu nukulké tukaran, lan wong brangasan okèh paneraké.

²³Watek sombong njalari asoré awak, nanging sing andap asor kuwi olèh lem-leman.

²⁴Sapa sing nampani panduman sangka maling, kuwi sengit marang awaké. Wis krungu tibané bebendu, nanging ora ngomong.

²⁵Wedi marang wong, kuwi nekaké jiret, nanging sapa sing pertyaya marang GUSTI kuwi diayomi.

²⁶Akèh wong golèk kawelasan marang sing nyekel pangwasa, nanging keadilan kuwi sangka GUSTI.

²⁷Wong bodo kuwi njijiki kanggo wong bener, lan sing jujur mlakuné kuwi reget kanggo wong duraka.