Read Caribbean Javanese Wulang Bebasan 3 Bible Online

Wulang Bebasan 3 - Caribbean Javanese bible

Wulang Bebasan 3

¹Hé anakku, aja lali marang piwulangku, lan atimu ngrumatana kabèh pituturku,

²awit umur dawa lan urip nganti tuwa, uga katentreman bakal ditambahké marang kowé.

³Katrésnan lan kasetian supaya aja nganti ninggal kowé, kuwi kalungna ing gulumu, tyateten ing atimu;

⁴nganti kowé olèh kawelasan lan dadi kajèn ing ngarepé Gusti Allah lan ing ngarepé manungsa.

⁵Pertyayaa marang GUSTI karo sak kabèhé atimu, lan aja njagakké marang pangertènmu déwé.

⁶Ing sak mlakumu ngakonana Panjenengané, mesti Panjenengané bakal ngluruské dalanmu.

⁷Aja rumangsa pinter déwé, wedia lan ngajènana marang GUSTI lan ngedohana sing ala,

⁸kuwi sing bakal maraské awakmu, lan nyegeraké balung-balungmu.

⁹GUSTI luhurna karo bandamu lan karo panènanmu pametuné pisanan;

¹⁰bakal lumbungmu dikebaki nganti lubèr, lan peresanmu lubèr angguré.

¹¹ Hé anakku, aja nampik marang piwulangé GUSTI, lan aja jelèh marang pepéling-pepélingé,

¹²awit GUSTI kuwi mulangi wong sing ditrésnani, ya kaya bapak mulangi marang anak sing ditrésnani.

¹³Rahayu wong sing nampa kawityaksanan, wong sing olèh kapinteran,

¹⁴awit olèh-olèhé kawityaksanan kuwi ngungkuli olèh-olèhé slaka, lan pametuné ngungkuli emas.

¹⁵Ajiné ngungkuli diaman, apa waé sing kok karepaké ora bisa madani.

¹⁶Tangané tengen nggegem umur dawa, sing tangané kiwa nyekel kasugihan lan kehormatan.

¹⁷Dalané kuwi kebak kabekjan, lan sak kabèhé dalané anané mung tentrem.

¹⁸Kuwi dadi wit panguripan kanggo wong sing pada nyekel lan sing pada gondèlan kuwi diarani beja.

¹⁹Karo kawityaksanan GUSTI enggoné nelesi bumi, lan enggoné netepké langit karo pangertèn,

²⁰awit sangka pangertèné Gusti Allah, banyuné segara dipentyarké, lan mendung nètèské ebun.

²¹Hé anakku, panimbang lan kawityaksanan aja nganti adoh sangka ngarepmu, kuwi simpenen,

²²kuwi bakal dadi uripé nyawamu, lan kanggo kalung ing gulumu.

²³Mlakumu ing dalanmu bakal slamet, lan sikilmu ora bakal kesandung.

²⁴Yèn kowé ngglétak, bakal ora kagèt, nanging bisa lèyèh-lèyèh lan turu kepénak.

²⁵Aja wedi marang sing nggegirisi sing tekané dadakan, utawa marang karusakané wong duraka, yèn nekani.

²⁶Awit GUSTI sing bakal dadi pengandelmu, lan sing bakal njaga sikilmu supaya aja nganti kejiret.

²⁷Aja nggondèli kabetyikan marang wong sing pantes nampani, sakjané kowé bisa nandangi kuwi.

²⁸Kowé aja ngomong marang pepadamu: “Lungaa, lan balia, sésuk bakal tak kèki,” sakjané waktu kuwi kowé nduwé apa sing dijaluk.

²⁹Aja ngrantyam nggawé memala marang pepadamu, awit enggoné manggon bareng karo kowé lan pertyaya marang kowé.

³⁰Aja padu karo wong tanpa sebab; yèn wongé ora nindakké sing ala marang kowé.

³¹Aja mèri marang wong sing duraka, lan aja milih dalané, senajan mung siji waé sing kok pilih;

³²awit wong sing mlaku nyasar kuwi ala kanggo GUSTI, nanging karo wong sing temen sesrawungané raket.

³³Omahé wong duraka kuwi kanggonan bebenduné GUSTI, nanging panggonané wong bener diberkahi.

³⁴Para wong memoyok, kuwi dipoyoki karo Panjenengané, nanging para wong sing andap asor kuwi ditrésnani.

³⁵Wong wityaksana bakal olèh warisan kehormatan, nanging wong bodo bakal nampa pemoyok.