Read Caribbean Javanese Wulang Bebasan 31 Bible Online

Wulang Bebasan 31 - Caribbean Javanese bible

Wulang Bebasan 31

¹Iki tembungé ratu Lemuèl, ratu ing Masa, sing diwulangké karo ibuné marang piyambaké.

²Hé anakku, anak sing tak lairké, anaké perjanjianku, apa sing bakal tak omongké marang kowé?

³Kekuwatanmu aja kok wènèhaké marang wong wadon, mengkono uga mlakumu, marang para wong wadon sing ndadèkké rusaké para ratu.

⁴Hé Lemuèl, ora pantes kanggoné para ratu, ora apik para ratu yèn ngombé anggur, utawa para penggedéné yèn njupuk ombèn sing nggawé mendem.

⁵Awit sangka enggoné ngombé mau, terus nglalèkké apa sing wis ditetepaké, lan ngénggak-ngénggoké wewenangé wong-wong sing ditindes.

⁶Ombèn sing nggawé mendem kuwi wènèhna marang wong sing arep ngrusak uripé, lan angguré marang wong sing susah atiné;

⁷kuwi bèn pada ngombé supaya lali marang mlaraté, lan ora kèlingan marang kasusahané menèh.

⁸Tutukmu bukaken kanggo wong bisu, lan kanggo wewenangé wong sing nelangsa.

⁹Tutukmu bukaken lan nggawéa putusan sing adil. Wong sing ditindes lan sing mlarat pada wènèhana wewenangé.

¹⁰Bojo wadon sing wityaksana sapa sing bisa nemu? Nanging ajiné ngungkuli diaman.

¹¹Atiné sing lanang pertyaya marang wong wadon kuwi, sing lanang ora tau kekurangan untungé.

¹²Tansah nggawé betyik marang sing lanang, ora tau nindakké ala, ing sakjeké uripé.

¹³Ngupaya wulu lan damèn, lan seneng nggarap penggawéan karo tangané.

¹⁴Kaya prau-prauné pedagang, nekakké rejekiné sangka panggonan sing adoh.

¹⁵Enggoné tangi ijik peteng, terus nyawiské pangan kanggo wong sak omah lan ngedum gawéan marang sak kabèhé réwangé wadon.

¹⁶Bisa tuku kebon, sing dikarepké, upahé tangané kanggo ragat nanduri kebon anggur.

¹⁷Bangkèkané disabuki karosan, lengené dikuwatké.

¹⁸Dèwèké weruh, yèn pametuné nguntungké, yèn mbengi dimaré ora mati.

¹⁹Tangané ditumpangké ing jantra, drijiné nyekel tenunané.

²⁰Tangané dilungakké marang wong sing ditindes, ngelungké tangané marang wong mlarat.

²¹Ora sumelang kanggo wong sak omah ing waktu tibané salju, awit wong sak omah pada nganggo sandangan rangkep.

²²Nggawé kasur kanggo awaké déwé, penganggoné rupa mori lenan alus lan kain wungu.

²³Sing lanang kesuwur ing gapurané kuta, yèn lungguhan karo para tuwa-tuwané negara.

²⁴Sing wadon nggawé sandangan mori lenan, terus didol, lan masrahaké sabuk marang para wong dagang.

²⁵Sandangané kekuwatan lan kaluhuran, kanggo dina mburiné mung ngguyu waé.

²⁶Enggoné mbukak tutuké karo kawityaksanan, lan ilaté kanggonan piwulang sing alus.

²⁷Tansah mandori sak obahé brayaté, lan ora tau mangan rejekiné wohé penggawé males.

²⁸Anak-anaké pada tangi lan ngarani ibuné rahayu, uga bojoné ya ngelem-elem marang sing wadon, tembungé:

²⁹Akèh wong wadon sing luhur, nanging kowé ngungkuli kuwi kabèh.

³⁰Werna apik kuwi goroh lan ayuné rupa kuwi tanpa guna, nanging wong wadon sing wedi lan ngajèni marang GUSTI kuwi dipuji.

³¹Kuwi wènèhana panduman sangka wohé tangané penggawéné kuwi bèn ngelem-elem dèwèké ing gapura!