Read Caribbean Javanese Wulang Bebasan 5 Bible Online

Wulang Bebasan 5 - Caribbean Javanese bible

Wulang Bebasan 5

¹Hé anakku, gatèkna marang kawityaksananku, kupingmu rungokna marang kapinteran sing tak wulangké,

²supaya kowé gondèlan kawityaksanan, lan lambému ngrumati kapinteran.

³Awit lambéné wong wadon lonté nètèské madu, lan tyetaké lunyu ngungkuli lenga;

⁴nanging pungkasané pait kaya peru, lan landepé kaya pedang sing mempan kiwa-tengen,

⁵jangkahé sikilé medun menyang pati, jangkahé menyang ndonyané wong mati.

⁶Mlakuné ora metu ing dalané urip, mlakuné nyasar ora dingertèni.

⁷Awit sangka kuwi, hé anak-anak, pada rungokna tembung-tembungku, aja nyimpang sangka pituturé tutukku.

⁸Mlakumu ngedohana wong wadon mau, lan aja nyedaki lawangé omahé,

⁹supaya enomé uripmu aja kok pasrahaké marang wong liyané, lan umurmu marang wong sing nduwé welas asih;

¹⁰supaya wong liya aja nganti mareki awaké karo kasugihanmu, lan upahé kangèlanmu aja nganti tiba marang wong sing ora kok kenal,

¹¹lan ing pungkasané kowé bakal sambat-sambat, yèn daging lan awakmu pada rusak kabèh;

¹²lan tembungmu: “Kenèng apa aku kok geting marang piwulang, lan atiku kok nampik pamelèh,

¹³kenèng apa, aku ora ngrungokké tembungé para guruku, lan ora ngrungokké marang tembungé sing pada mulangi aku?

¹⁴Mèh waé aku kejlungup ing werna-werna tyilaka ing sak tengahé pasamuan lan kumpulan.”

¹⁵Kowé ngombéa banyu sangka sumurmu déwé, ngombéa sangka sumurmu sing lubèr.

¹⁶Apa pantes yèn sumbermu lubèr kaya kalèn-kalèn ing alun-alun.

¹⁷Kuwi mung dadia duwèkmu déwé, aja nganti ana wong sing mèlu nduwèni.

¹⁸Sumbermu supaya diberkahi, bungaha karo bojomu sing pisanan.

¹⁹Menjangan sing apik, kidang sing ayu supaya susuné kuwi tansah maremké kowé, supaya katrésnané kuwi nggandrungké kowé.

²⁰Hé anakku, kenèng apa kowé nganti kepéntyut marang wong wadon lonté, lan ngrangkul dadané wong wadon liya?

²¹Awit GUSTI ora ketutupan marang sak kabèhé tumindaké wong, lan weruh kabèh penggawéné manungsa.

²²Wong duraka ketyekel karo sak njeruhné penggawé alané, lan kejiret karo taliné dosané déwé.

²³Wong kuwi mati, awit ora olèh piwulang, lan kesasar awit sangka bangeté bodoné.