Read Caribbean Javanese Wulang Bebasan 7 Bible Online

Wulang Bebasan 7 - Caribbean Javanese bible

Wulang Bebasan 7

¹Hé anakku, gatèkna pituturku, lan préntahku simpenen ing atimu.

²Préntahku gugunen, mesti kowé bakal urip, lan piwulangku simpenen kaya irengé mripatmu.

³Talènana kabèh kuwi ing drijimu, lan tulisana ing papané atimu.

⁴Kawityaksanan kuwi omongana: “Kowé kuwi sedulurku,” lan pangertèn kuwi anggepen sedulurmu,

⁵supaya kowé diayomi sangka wong wadon lonté, lan wong wadon liya, sing alus bujukané.

⁶Awit waktu aku nalika ngungak sangka jendélané omahku, ngintyeng sangka rujiné omahku,

⁷aku weruh ing antarané wong sing ora nduwé pengalaman, aku weruh ing antarané para nom-noman ana sakwijiné jaka sing tanpa pikiran,

⁸mbeneri nyabrang ing sak tyedaké pojok dalan, njangkah marani omahé wong wadon sing kaya mengkono mau,

⁹waktuné repet-repet soré, mbengi sing peteng.

¹⁰Lah, terus ana wong wadon metuk, sing nganggo sandangan wong wadon lonté, sing lityik atiné;

¹¹grapyak lan tyriwis wong wadon kuwi, sikilé ora bisa meneng ing omahé:

¹²sedilut ing dalan, sedilut engkas ing lapangan, ngadang ing saben enggok-enggokan.

¹³Wong nom mau terus dityekel lan diambungi, karo praupan tanpa rikuh lan pekéwuh, ngomong mengkéné:

¹⁴“Kula kudu pasrah kurban keslametan, ing dina iki kula mbayar janjiku.

¹⁵Mila kula metu metuk sampéyan, pantyèn bakal nggolèki sampéyan, lan saiki kula bisa ditemokké sampéyan.

¹⁶Ambèn kula wis kula gelari kasur, kain mori lenan werna-werna gawéan Egipte.

¹⁷Ambèn kula wis kula sebari: mur, gaharu karo kayu legi.

¹⁸Hayuk pada ngumbar katrésnan nganti ésuk, pada sukak-sukak nganakké katrésnan.

¹⁹Awit bojo kula ora ing omah, mbeneri mlaku adoh,

²⁰nggawa duwit sak kantong, mulihé ijik mbésuk ngarepké mbulané bunder.”

²¹Wong nom mau dibujuk karo tembungé alus, digoda karo werna-werna godané lambéné.

²²Dadakan wong nom mau terus ngetutké wong wadon kuwi kaya sapi dituntun menyang pejagalan, lan kaya wong bodo sing dibanda arep diukum;

²³nganti ana panah sing nunjem ing atiné, ya kaya manuk sing marani jiret karo gelis-gelis, ora ngerti yèn uripé diantyam ing bebaya.

²⁴Mulané, hé anak-anak, pada rungokna pituturku, rungokna tembung-tembungé tutukku.

²⁵Atimu aja nganti kegèrèt marang dalané wong wadon kuwi, aja nasarké awakmu déwé ing dalan-dalané.

²⁶Awit wis okèh wong sing mati karo wong wadon kuwi, lan okèh banget tyatyahé wong sing dipatèni.

²⁷Omahé kuwi dalan sing nuju menyang ndonyané wong mati, sing medun menyang ing kamar-kamaré pati.