Read Caribbean Javanese Wulang Bebasan 8 Bible Online

Wulang Bebasan 8 - Caribbean Javanese bible

Wulang Bebasan 8

¹Kawityaksanan apa ora mbengok-mbengok, lan kapinteran apa ora ngetokké swarané?

²Ing panggonan sing duwur ing pinggir dalan, ing simpangané dalan-dalan, ing kono enggoné ngadek,

³ing sandingé gapura ngarepé kuta, ing dalan mlebu enggoné mbengok karo swara banter, tembungé:

⁴“Hé para wong lanang, kowé sing Tak pituturi, marang para anaké manungsa, swara-Ku Tak tujokké.

⁵Hé wong ora nduwé pengalaman, pada nggolèkana kapinteran, hé para wong ndablek, pada ngertènana kuwi ing sak njeruhné atimu.

⁶Pada rungokna, awit Aku bakal ngomongké perkara sing jeru, lan arep mbukak ilat-Ku lan ngomongké perkara sing bener.

⁷Awit ilat-Ku ngomongké sing bener, lan duraka kuwi sing njijiki kanggo ilat-Ku.

⁸Apa sing metu sangka tutuk-Ku kuwi adil, ora pisan-pisan ana sing mlintat-mlintut utawa goroh.

⁹Kabèh kuwi tyeta kanggo wong sing pinter, lan bener kanggo sing nduwé kaweruh.

¹⁰Piwulang-Ku kuwi tampanana ngungkuli slaka, lan kapinteran ngungkuli emas murni.

¹¹Awit kawityaksanan kuwi ajiné ngungkuli diaman, lan apa waé sing dikepéngini wong, ora ana sing madani.”

¹²Aku, Wityaksana, nunggal bebarengan karo kapinteran, lan aku nemokké kaweruh lan kawityaksanan.

¹³Wedi lan ngajèni marang GUSTI kuwi sengit marang sing ala, Aku sengit marang kesombongan, gemunggung lan pratingkah sing ala, uga tutuk sing kebak goroh.

¹⁴Pitutur lan panimbang kuwi duwèk-Ku, Aku sing nduwé pangertèn lan Aku sing nduwé kekuwatan.

¹⁵Para ratu enggoné mréntah awit sangka Aku, mengkono uga para penggedéné enggoné nindakké pengadilan.

¹⁶Para penggedéné enggoné kanggonan pangwasa kuwi awit sangka Aku, mengkono uga para luhur lan sak kabèhé rèkter sak jagat.

¹⁷Aku trésna marang wong sing trésna marang Aku lan wong sing tlatèn enggoné nggolèki Aku, mesti bakal ketemu.

¹⁸Kasugihan lan kaluhuran kuwi pangwasa-Ku, uga banda sing tetep lan keadilan.

¹⁹Woh-Ku kuwi ngungkuli emas, malah ngungkuli emas tulèn, pametu-Ku kuwi ngungkuli slaka pilihan.

²⁰Aku mlaku ing dalané kabeneran, ing tengah-tengahé dalan keadilan,

²¹supaya wong sing trésna marang Aku pada Tak wènèhi warisan banda, lan panggonan simpenané bakal Tak kebaki.

²²Aku wis digawé karo GUSTI dadi wiwitan penggawéané, kanggo penggawéané sing wiwitan ing jaman mbiyèn.

²³Aku wis dianakké waktu jaman mbiyèn, ya ing wiwitan mula, sak durungé bumi ana.

²⁴Aku wis lair sak durungé banyu segara gedé ana, sak durungé ana sumber-sumberé sing lubèr banyuné.

²⁵Sak durungé gunung-gunung mantyep lan sak durungé ana puntuk-puntuk Aku wis lair.

²⁶Ya sak durungé Panjenengané nggawé daratan lan ara-ara, malah durung ana bleduk sing wiwitan.

²⁷Waktu Panjenengané ngrantyam anané langit, Aku ing kono, ya ing waktuné nggaris sikilé langit ing lumahé segara gedé,

²⁸ya ing waktuné netepké mendung-mendung ing nduwur, lan waktuné sumberé segara gedé wiwit pada mbludak karo banter,

²⁹waktu Panjenengané netepaké watesé segara, supaya banyu aja nganti nerak préntahé, lan ing waktuné masang dasaré bumi.

³⁰Aku dadi anak katrésnan-Né sing mbarengi Panjenengané, sedina-dina Aku nggawé senengé atiné, tansah dolanan ing ngarepé.

³¹Aku dolanan ing bumi duwèké, lan para anaké manungsa pada dadi kesenengan-Ku.

³²Mulané, hé anak-anak, pada rungokna tembung-Ku, awit rahayu wong sing pada njaga marang dalan-dalan-Ku.

³³Ngrungokna piwulang, mesti kowé dadi wityaksana, aja kok lalèkké.

³⁴Rahayu wong sing ngrungokké préntah-Ku, sing sedina-dina pasrah ing lawang-Ku, lan njaga ing kusèné gapura-Ku.

³⁵Awit sapa sing nemu Aku, kuwi nemu urip, lan mesti olèh kawelasané GUSTI.

³⁶Nanging sapa sing ora nemu Aku, kuwi ngrugèkké awaké déwé, sak kabèhé wong sing sengit marang Aku, kuwi nrésnani pati.