Read Caribbean Javanese Juru Kotbah 1 Bible Online

Juru Kotbah 1 - Caribbean Javanese bible

Juru Kotbah 1

¹Iki tembungé Juru Kotbah, anaké Daved, ratu ing Yérusalèm.

²Tanpa guna, tembungé Juru Kotbah, tanpa guna, sembarang kabèh kuwi tanpa guna.

³Apa gunané manungsa, banget-banget nglakoni kangèlan ing sak ngisoré srengéngé.

⁴Turunan sing siji lunga, turunan sijiné teka, nanging bumi iki tetep ana.

⁵Srengéngé njedul, srengéngé mingslep, terus gelis-gelis marani panggonan mletèkké menèh.

⁶Angin nyebul ngidul, terus mbalik ngalor, terus-terusan enggoné mubeng, lan sak njeruhné mubang-mubengé, angin mau terus bali.

⁷Kabèh kali pada mili nang segara, nanging segara ora dadi kebak, menyang endi miliné kali kuwi, ya menyang kono miliné kali.

⁸Kabèh kuwi nggawé jelèh, nganti ora bisa dityritakké karo manungsa; mripat ora warek enggoné ndeleng, kuping ora warek enggoné ngrungokké.

⁹Apa sing tau ana, bakal ana menèh, lan apa sing tau digawé, bakal digawé menèh; ora ana barang sing anyar, ing sak ngisoré srengéngé.

¹⁰Apa ana barang sing bisa diomongké: “Delengen, iki anyar?” Sakjané kuwi dèk mbiyèn wis ana, wis suwé banget sak durungé kita ana.

¹¹Génerasi sing kepungkur wis dilalèkké, uga génerasi sing bakal kelakon, ya bakal dilalèkké.

¹²Aku, Juru Kotbah, ratuné Israèl ing Yérusalèm.

¹³Aku karo sak kabèhé atiku kanggo nitipriksa lan nliti karo kawityaksanan marang samubarang kabèh sing kelakon ing sak ngisoré srengéngé. Kuwi penggawéan sing angèl sing dikèkké karo Gusti Allah marang para anak-anaké manungsa, supaya bisa nggawé keselé awaké déwé.

¹⁴Aku wis weruh kabèh penggawé sing digawé karo wong ing sak ngisoré srengéngé, nanging kabèh kuwi tanpa guna lan njaring angin.

¹⁵Apa sing béngkong ora bisa dilentyengké, lan sing ora ana kuwi ora bisa diitung.

¹⁶Aku ngomong ing sak njeruhné ati mengkéné: “Aku wis, nggedèkké lan nambahi kawityaksanan ngungkuli kabèh wong sing nyekel pemrintahan ing Yérusalèm sak durungé aku, lan atiku wis kanggonan kawityaksanan lan kaweruh okèh.”

¹⁷Aku wis karo karep sak kabèhé atiku weruh tegesé kawityaksanan lan kaweruh, bodo lan goblok, lan aku mangertèni yèn iki uga ngupaya njaring angin,

¹⁸awit kawityaksanan okèh kuwi ndadèkké susahé ati, lan sapa sing ngakèhké kaweruh kuwi ngakèhké kasusahan.