Read Caribbean Javanese Juru Kotbah 10 Bible Online

Juru Kotbah 10 - Caribbean Javanese bible

Juru Kotbah 10

¹Laler sing mati njalari mambu batyin lenga gawéané wongé sing tukang nggawé lenga; mengkono uga kebodoan setitik waé kuwi bisa ngrusak kawityaksanan lan kahurmatan.

²Atiné wong wityaksana kuwi lempeng, nanging atiné wong bodo kuwi béngkong.

³Uga yèn mlaku ing dalané wong bodo kuwi pikirané ya ketul, lantaran omongané wongé, kétok yèn dèwèké kuwi bodo.

⁴Yèn ratu nesu marang kowé, aja ninggal panggonanmu, awit kesabaran kuwi bisa ngendek kesalahan-kesalahan sing gedé.

⁵Aku weruh sakwijiné memala ing sak ngisoré srengéngé, ya kuwi kesalahan sing tekané sangka wong sing nyekel pangwasané:

⁶Akèh panggonan sing duwur, sing dilungguhi karo wong bodo, lan panggonan sing endèk dilungguhi karo wong sugih.

⁷Aku weruh batur numpak jaran, lan para penggedéné pada mlaku sikil kaya batur.

⁸Sapa sing nggawé juglangan bakal nyemplung mrana, lan sapa sing njebol témbok bakal dityokot karo ula.

⁹Sapa sing metyah watu bakal kelaran; sapa sing nyigari kayu bakal kena ing bebaya.

¹⁰Yèn kampaké ketul lan ora diungkal, wong terus kudu ngetokké kekuwatan sing luwih gedé, nanging sing perlu supaya bisa olèh-gawé, kuwi kawityaksanan.

¹¹Yèn ula enggoné nyokot sak durungé ditelukké, karo tukangé bakal ora olèh nggawé.

¹²Tetembungan sing metu sangka tutuké wong wityaksana kuwi sedep, nanging lambéné wong bodo kuwi nguntal wong kuwi déwé.

¹³Tembungé wiwitan sing metu sangka tutuké kuwi goblok, lan pungkasané gunemané kuwi kebodoan sing nyilakani.

¹⁴Wong bodo kuwi okèh rembukané, senajan wong ora weruh apa sing bakal kelakon, lan sapa ta sing bakal weruh apa sing bakal kelakon ing sakwisé dèkné?

¹⁵Rekasané wong bodo kuwi nggawé keselé wong kuwi déwé, awit ora weruh dalan menyang kuta.

¹⁶Tyilaka kowé hé negara, yèn ratumu botyah tyilik lan para penggedéné ésuk-ésuk wis pésta!

¹⁷Rahayu kowé hé negara, yèn ratumu tekané sangka golongan penggedé, lan para penggedéné pada mangan yèn wis waktuné kanggo kekuwatané lan ora kanggo mendem.

¹⁸Awit sangka malesé, payoné amblek, lan awit sangka nglemer omahé botyor.

¹⁹Supaya bisa ngguyu, wong nganakké pésta, anggur nggawé senengé urip lan duwit njalari kabèh kuwi mau bisa keturutan.

²⁰Senajan mung dibatin waé aja nganti kowé nyepatani ratu lan ing kamar turu kowé aja nyepatani wong sugih, awit manuk ing awang-awang uga bisa ngabaraké tembungmu, lan kabèh sing karo swiwi bisa ngabaraké apa sing kok omongaké.