Read Caribbean Javanese Juru Kotbah 12 Bible Online

Juru Kotbah 12 - Caribbean Javanese bible

Juru Kotbah 12

¹Elinga marang sing nggawé kowé ing sak njeruhné ijik enom, sak durungé nemoni dina sing ala, lan taun-taun sing kok omongké mengkéné: Ing waktu kuwi aku ora nduwé kesenengan;

²Sak durungé srengéngé lan pepadang, mbulan lan lintang dadi peteng, lan sakwisé udan, mendungé bali menèh.

³Ing waktu sing njaga omah pada gemeter, lan wong-wong sing rosa pada mbungkuk, lan para wong wadon sing nggiling pada lèrèn, awit tyatyahé suda, lan sing pada weruh sangka tyendéla, pada dadi mblereng.

⁴Uga lawang-lawang ing pinggir dalan pada mineb, swarané gilingan dadi lirih, swarané dadi kaya ngotyèhé manuk, lan kabèh swarané dadi lirih.

⁵Wong-wong uga pada wedi marang unggah-unggahan, ing ndalan ana sing medèni, wit amandel ngembang, walangé mlakuné ngrekasa karo nyèrèt awaké, lan kepénginané seneng-seneng ora ana menèh, awit manungsa lunga nang omahé sing langgeng, uga para tukang nangis, pada kluyuran ing ndalan.

⁶Sak durungé ranté slaka dipedot, lan dimar emas dipetyah, sak durungé kendiné diremuk ing tyedaké sumber, lan kèrèkané timba dirusak ing nduwuré sumur,

⁷uga lebu dadi lemah kaya ing wiwitan, lan rohé bali ing ngarepé Gusti Allah sing ngekèki.

⁸Banget enggoné tanpa guna, mengkono tembungé Juru Kotbah, banget enggoné tanpa guna, kabèh kuwi tanpa guna.

⁹Juru Kotbah kuwi kejaba nduwé kawityaksanan, ya ngekèki piwulang bab kaweruh marang umat. Dèkné nimbang, nguji lan nggawé wulang bebasan okèh.

¹⁰Juru Kotbah ngupaya bisané olèh tetembungan sing nyenengké lan nulis tetembungan bab sing bener lan sing jujur.

¹¹Tembung-tembungé wong wityaksana kuwi kaya kawat eri lan kumpulané tulisané kaya paku-paku sing mantyep, sing diwènèhké karo sakwijiné pangon.

¹²Lan menèh, anakku, sing ati-ati! Nggawé kitab okèh kuwi ora ana entèkké lan sinau okèh kuwi marakké awaké kesel banget.

¹³Kanggo pungkasané sing tak krungu ya kuwi: Wedia marang Gusti Allah lan tetepana pepakon-pepakoné, awit iki kuwajipané saben wong.

¹⁴Awit Gusti Allah bakal ngadili samubarang sing didelikké, sing apik lan sing ala.