Read Caribbean Javanese Kidung Luhur 2 Bible Online

Kidung Luhur 2 - Caribbean Javanese bible

Kidung Luhur 2

¹Kula kuwi kembang lèli sangka Saron, kembang bakung ing legokan.

²Katrésnanku kuwi ing sak tengahé para prawan enom dadi kembang bakung ing sak tengahé suketan.

³Katrésnanku kuwi ing sak tengahé para nom-noman kaya wit apel ing sak tengahé wit-witan ing alas. Aku kepéngin lungguh ing grumbulé, wohé legi rasané ing tyetaku.

⁴Dèkne nuntun aku mlebu ing omah pésta lan gendéra ing nduwurku kuwi trésna.

⁵Mbok aku dikuwatké karo panganan kismis, disegerké karo woh apel. Awit aku ngalami lara trésna.

⁶Tangané kiwa ing ngisoré sirahku, tangané tengen ngrangkul aku.

⁷Hé, para wong wadon ing Yérusalèm, kowé pada tak sepatani, kanggo kidang-kidang utawa menjangan wédok ing ara-ara; kowé aja nggugah lan ngobahké katrésnan, sak durungé dikarepké!

⁸Rungokna! Katrésnanku! Sawangen tekané, mlumpat-mlumpat ing gunung-gunung, mentyolot-mentyolot ing puntuk-puntuk!

⁹Katrésnanku kuwi kaya kidang, utawa anak menjangan. Delengen, piyambaké ngadek ing sak mburiné témbok kita, karo ngungak-ungak liwat jendéla-jendéla lan ngintyeng ing ruji-ruji.

¹⁰Katrésnanku wiwit ngomong marang aku: “Tangia, katrésnanku, mrénéa, tyah ayuku!

¹¹Awit delengen, waktu adem wis kliwat, udané wis terang lan wis kepungkur.

¹²Ing kebon wis kétok kembang-kembang, wis waktuné metik; manggungé manuk wis krungu ing tanah kita.

¹³Wit anjir wiwit woh, lan kembangé wit anggur mambu wangi. Tangia, katrésnanku, mrénéa, tyah ayuku!

¹⁴Manukku dara ing bolongan-bolongané watu, ing pandelikan pèrèng-pèrèngé gunung, pamèrké praupanmu, tokna swaramu; awit apik swaramu, lan ayu rupamu!”

¹⁵Aku pada tyekelna asu alasan kuwi, asu alasan sing tyilik, sing ngrusak kebon anggur, kebon anggurku sing lekas kembang!

¹⁶Katrésnanku kuwi duwèkku lan aku iki duwèké sing ngengon wedus ing sak tengahé kembang bakung.

¹⁷Sak durungé angin soré nyebul lan ayang-ayang ilang duh katrésnanku, Sampéyan supaya gelem mulih, lan gelem nandangi kaya kidang utawa kaya anak menjangan ing gunung-gunung tanduran wangi-wangian!