Read Caribbean Javanese Kidung Luhur 3 Bible Online

Kidung Luhur 3 - Caribbean Javanese bible

Kidung Luhur 3

¹Nuju ing wayah mbengi aku nggolèki jantung atiku ing peturonku. Tak golèki, nanging ora ketemu.

²Aku arep tangi lan mubeng-mubeng ing kuta ing dalan-dalan lan ing lapangan Sampéyan tak golèki, jantung atiku. Tak golèki, nanging ora ketemu.

³Aku kepetuk para penjaga ngubengi kuta. “Apa sampéyan weruh jantungé ati kula?”

⁴Ijik waé aku pada pisahan karo para wong ronda mau, aku ketemu karo jantungé atiku; terus tak tyandak lan ora tak tyulké, nganti tak gawa ing omahé ibuku, ing kamaré sing nglairké aku.

⁵Hé, para wong wadon ing Yérusalèm, kowé pada tak sepatani; kanggo kidang-kidang lan menjangan-menjangan ing ara-ara: Kowé aja pada nggugah lan ngobahké katrésnan sak durungé dikarepké.

⁶Lah apa ta kuwi sing kemebul sangka ara-ara samun kaya kemebulé kebul, gandané kaya wanginé mur lan menyan lan uwur wangi werna-werna sangka wong dagang?

⁷Lah kuwi joli tumpakané Salomo, diubengi karo suradadu suwidak, sangka tunggalé para suradadu ing Israèl.

⁸Kabèh pada nggawa pedang, pinter ing perang, kabèh pada nyengkelit pedang, awit bebaya wayah mbengi.

⁹Salomo wis nggawé tandu sangka kayu Libanon.

¹⁰Tyagak-tyagaké sing digawé sangka slaka, sèndènané emas, jagongané rupané wungu larang, ing njeruhné digambari karo tanda katrésnan karo para wong wadon ing Yérusalèm.

¹¹Para wong wadon ing Sion, pada metua, lan nyawanga marang Salomo, nganggo makuta, sing dienggoké karo ibuné waktu dina kawinané, ing dina kesenengané atiné.