Read Caribbean Javanese Kidung Luhur 4 Bible Online

Kidung Luhur 4 - Caribbean Javanese bible

Kidung Luhur 4

¹Duh, katrésnanku, kowé kuwi ayu, tenan ayu rupamu kuwi! Mripatmu kétok kaya manuk dara, ing sak ngisoré kudungmu. Rambutmu kaya kumpulan wedus berok sing kétok ngombak-ombak medun sangka pegunungan Giléad.

²Untumu kaya kumpulan wedus gèmbèl sing entas dityukur, lan metu sangka guyangan, kabèh manak kembar lan ora ana sing ora nduwé anak.

³Lambému kaya bolah abang, tutukmu apik. Pilinganmu kétok kaya woh mulwa disigar ing sak ngisoré kudungmu.

⁴Gulumu kaya menarané Daved, sing dipatyaki karo kalung okèh, tamèng 1000 dityantolné ing kono lan kabèh tamèngé kuwi duwèké para suradadu.

⁵Susumu kaya anak menjangan loro utawa anak kidang kembar sing ijik mangan suket ing sak tengahé kembang bakung.

⁶Sak durungé angin soré nyebul lan ayang-ayang ngilang, aku kepéngin munggah menyang gunung mur lan pegunungan menyan.

⁷Kowé kuwi ayu banget, duh katrésnanku, awakmu ora kanggonan tyiri.

⁸Maraa medun mréné sangka gunung Libanon, duh pengantèn wadonku, muduna mréné sangka gunung Libanon; muduna sangka putyuké gunung Amana, sangka putyuké gunung Senir lan gunung Hèrmon, sangka guwa-guwané singa, lan pegunungan ing panggonané matyan tutul!

⁹Kowé nggawé dek-dekané atiku, adik, pengantèn wadonku, karo sak kedèpé mripatmu kowé nggawé dek-dekané atiku lan karo kalung ing gulumu.

¹⁰Pantyèn nyata énaké trésnamu, duh adik, pengantèn wadonku. Trésnamu kuwi énaké ngungkuli anggur, lan wanginé lengamu ngungkuli kabèh wangi-wangian.

¹¹Madu murni tumètès sangka lambému, pengantèn wadonku, madu lan mèlek ing sak ngisoré ilatmu, lan ambuné sandanganmu kuwi kaya ambuné gunung Libanon.

¹²Adik, pengantèn wadonku, kowé kuwi kebon sing ditutup, kebon sing ditutup lan sumberé banyu sing diségel.

¹³Trubusan-trubusanmu kuwi kebon wit mulwa, sing énak wohé, kembang patyar lan narwastu,

¹⁴narwastu lan sapran, tebu lan legi janganan, lan werna-werna wit menyan, mur lan gaharu, uga sak rupané wangi-wangian pilihan.

¹⁵Duh, sampéyan sumberé banyu ing kebon, sumberé banyu urip, sing mili sangka gunung Libanon!

¹⁶Hé angin lor, hé angin kidul, tangia lan mrénéa, nyebula ing kebonku supaya ambuné wangi-wangian ngganda! Supaya katrésnanku teka ing kebon angguré lan mangan woh-wohan sing énak.