Read Caribbean Javanese Kidung Luhur 5 Bible Online

Kidung Luhur 5 - Caribbean Javanese bible

Kidung Luhur 5

¹Adik, pengantèn wadonku, aku teka ing kebonku, nglumpukké mur lan wangianku, tak pangan talané lan maduku, tak ombé anggur lan mèlekku. Para kantya, mangana lan ngombéa, ngombéa nganti mendem trésna!

²Aku turu, nanging atiku melèk. Rungokna, katrésnanku totok-totok. “Dibukakké lawangé, adik, katrésnanku, manuk daraku, idam-idamanku, awit sirahku klebes ebun, lan rambutku kebak tètèsé ebun mbengi!”

³“Kula wis nyopot klambiku, apa kula bakal dandan menèh? Kula wis ngresiki sikil kula, apa bakal kula nggawé reget menèh?”

⁴Katrésnanku terus nglebokké tangané sangka bolongané lawang, atiku banjur dek-dekkan.

⁵Aku mentyolot mbukakké lawangé katrésnanku, tanganku nètèské mur, drijiku nètèské mur èntyèr, ing tyekelané kantyingan lawang.

⁶Katrésnanku tak bukaké lawang, nanging katrésnanku wis lunga, ngilang. Aku kaya semaput dongé dèkné ngilang. Piyambaké tak golèki, nanging ora ketemu, tak tyeluki, nanging ora semaur.

⁷Wong jaga ing kuta dongé kepetuk aku, aku dipentungi, ditatoni, sléndangku direbut karo wong sing jaga témbok.

⁸Hé, para wong wadon ing Yérusalèm, kowé pada tak sumpahi: yèn kowé kepetuk katrésnanku, apa sing arep kok omongké marang Piyambaké? Omongana, yèn aku ngalami lara trésna!

⁹- Hé wong ayu ing sak tengahé para wong wadon, apa bédané katrésnanmu karo katrésnan liyané, nanging aku nganti kok sumpahi mengkéné?

¹⁰- Katrésnanku kuwi putih resik lan sumringah, kétok déwé ing antarané puluhan éwu wong lanang.

¹¹Sirahé kaya emas, emas murni, rambuté ngandan-andan, ireng banget.

¹²Mripaté kaya manuk dara ing pinggir kali, adus karo mèlek lan njagong ing blumbang sing kebak.

¹³Pipiné kaya tanduran wangi-wangian, sing gandané wangi. Ilaté kaya bakung, sing nètèské mur èntyèr.

¹⁴Tangané gilingan emas, ditèmplèki karo watu-watu Tarsis, dadané kaya tamèng gading, ditèmplèki watu sapir.

¹⁵Sikilé kuwi kaya tyagak marmer putih, temumpang ing dasar emas murni. Dèkné kaya gunung Libanon, dipilih kaya wit-witan.

¹⁶Tutuké mung legi, sak obah osiké ngresepké. Kaya mengkono kuwi katrésnanku, ya kaya mengkono kantyaku, hé para wong wadon ing Yérusalèm!