Read Caribbean Javanese Kidung Luhur 7 Bible Online

Kidung Luhur 7 - Caribbean Javanese bible

Kidung Luhur 7

¹Duh anaké ratu wadon sing mulya, tenan apiké sikilmu karo nganggo sandal kuwi, lekukané bangkèkanmu kaya rerékan, gawèané tangané seniman.

²Pusermu kaya bunderé bokor, bèn aja kurang anggur tyampuran. Wetengmu kaya jagung ditumpuk, diubengi karo kembang bakung.

³Susumu kaya anak menjangan loro, utawa anak kidang kembar.

⁴Gulumu kaya menara gading, mripatmu kaya telaga ing Hèsbon, tyedak gapura Batrabim; irungmu kaya menara ing Libanon, sing madep marang kuta Damaskus.

⁵Sirahmu kaya gunung Karmèl, rambuté sirahmu wungu semu abang; sakwijiné ratu ketyantol ing klabangané.

⁶Kowé kuwi ayu lan apik banget rupamu, sing enak déwé sing diidam-idami wong.

⁷Awakmu kaya wit kurma, lan susumu dadi dompolané.

⁸Omongku: “Aku kepéngin mènèk ing wit kurma kuwi, lan nyekel dompol-dompolané. Susumu kaya dompolan anggur, lan napasé irungmu kaya ambuné woh apel.

⁹Tyetakmu alus kaya anggur!” Anggur kuwi mili nang untu lan lambé tanpa lèrèn.[3]

¹⁰Aku iki duwèké katrésnanku, kebimbangé tumuju marang aku.

¹¹Duh katrésnanku, hayuk pada mlaku-mlaku menyang ara-ara, turu ing sak tengahé kembang patyar!

¹²Hayuk, pada lunga menyang kebonan anggur ing wantyi ésuk mruput, lan weruh apa wité anggur wis metu kuntyupé, apa kembangé wis mekar, wit-witané mulwa apa wis kembang! Ing kono kula bakal ngesokké katrésnan kula marang sampéyan!

¹³Ambuné woh dudaim mambu, tyedaké lawangé kita ana woh-wohan rupa sing énak, sing wis suwé lan sing ijik waé dipetik. Kuwi wis kula simpen kanggo sampéyan, duh katrésnanku!