Read Caribbean Javanese Kidung Luhur 8 Bible Online

Kidung Luhur 8 - Caribbean Javanese bible

Kidung Luhur 8

¹Oh, yèn sampéyan kuwi sedulur kula lanang, sing nyusu ing susuné ibu kula, mesti bakal kula ambung, yèn ketemu ing njaba, awit ora ana wong sing bakal ngrèmèhké kula!

²Sampéyan bakal kula tuntun lan kula terké marang omahé ibu kula, supaya sampéyan mulangi marang kula. Sampéyan bakal kula kèki anggur sing apik yèn diombé, banyuné woh-wohé mulwa kula.

³Tangané sing kiwa nyangga sirahku, tangané tengen ngrangkul aku.

⁴Hé para putri ing Yérusalèm, kowé pada tak sumpahi, kena apa kowé pada nggugah lan ngobahké katrésnan sak durungé mateng?

⁵Sapa kaé sing njedul sangka ara-ara samun, sing lèndèh-lèndèh karo katrésnané? Ing sak ngisoré wit apel katrésnanmu tak gugah, ing kono enggoné ibumu meteng kowé, ing kono enggoné ibumu meteng lan nglairké kowé.

⁶Kula supaya sampéyan prenahké ing ati sampéyan, kaya ali-ali karo ségel ing ati lan kaya ali-ali karo ségel ing tangan sampéyan, awit katrésnan kuwi kuwat kaya pati, trésna kuwi mempengé kaya waé ndonyané pati, mulat-mulaté kaya urupé geni, sangka mulat-mulat geniné GUSTI!

⁷Banyu gedé ora bisa nyirep trésna, kali-kali ora bisa ngéntérké. Yèn ana wong sing ngekèkké kabèh bandané ing omahé digawé nebus katrésnan, mesti mung bakal disepèlèkké.

⁸Kita pada nduwé adik wadon, sing durung kétok susuné. Apa sing wajip kita tindakké kanggo adik kita wadon, yèn tekan dinané dilamar?

⁹Sak upama témbok, bakal kita ngekèki payon slaka ing nduwuré, sak upama lawang, bakal kita ngekèki palang kayu tyemara.

¹⁰- Aku iki témbok, lan susuku kaya menara. Ing mripaté waktu kuwi aku kaya kuta sing ngekèki kabekjan.

¹¹Salomo nduwé kebon anggur ing Baal-Hamon. Kebon anggur kuwi dipasrahké marang wong sing pada njaga, kanggo olèh-olèhé siji-sijiné masrahaké duwit slaka 1000.

¹²Kebon anggur kula, duwèk kula déwé, ing ngarepku, kanggo sampéyan duwit 1000 kuwi, duh Salomo, lan sing 200 kanggo wong-wong sing njaga woh-wohé.

¹³- Hé! sing manggon ing taman, kantya-kantyaku pada nggatèkké swaramu, aku ya bèn krungu!

¹⁴- Duh katrésnanku, Sampéyan supaya gelis gelem mlaku kaya kidang, utawa kaya anak kidang ing gunung-gunung tanduran wangi-wangian.