Read Caribbean Javanese Yésaya 11 Bible Online

Yésaya 11 - Caribbean Javanese bible

Yésaya 11

¹Ana trubusan sing bakal tukul sangka tunggaké Isai, lan ana semi sing tukul sangka oyoté sing bakal ngetokké woh.

²Kuwi bakal kedunan Rohé GUSTI, rohé kawityaksanan lan pangertèn, rohé pitutur lan kekuwatan, rohé kaweruh lan wedi lan ngajèni marang GUSTI;

³malah wedi lan ngajèni marang GUSTI kuwi sing dadi kesenengané. Panjenengané ora bakal ngadili mung waton katon waé utawa nibakké putusané miturut omongé wong.

⁴Nanging bakal ngadili para wong mlarat karo keadilan, lan bakal nibakké putusan kanggo para wong sing ditindes ing negara kono karo kejujuran; enggoné ngrangkèt bumi karo tembungé kaya karo teken, lan karo napasé tutuké enggoné bakal ngentèkké wong duraka.

⁵Panjenengané ora bakal nyimpang sangka kabeneran lan kasetian, kaya sabuk sing tetep nalèni bangkèkan.

⁶Asu alasan bakal manggon bebarengan karo wedus gèmbèl lan matyan tutul bakal njerum ing sandingé wedus. Pedèt lan anak singa bakal nyenggut suket bebarengan, lan bakal digiring karo botyah tyilik.

⁷Sapi lan bruwang bakal nyenggut suket bebarengan lan anak-anaké bakal tunggal pangonan, lan singa bakal mangan damèn kaya sapi.

⁸Botyah sing ijik nyusu bakal dolanan ing sak tyedaké rongé ula upas, lan botyah disapih bakal ngrogoh-ngrogoh ing rongé ula mandi.

⁹Ora ana sing bakal nglakoni ala utawa nandangi ora betyik ing sak kabèhé gunung-Ku sing sutyi, awit sak kabèhé bumi kebak ing kaweruh bab GUSTI, kaya banyuné segara sing nutupi dasaré.

¹⁰Ing waktu kuwi trubusan ing oyoté Isai bakal ngadek dadi gendéra kanggo para bangsa; sing bakal digolèki karo para taleré bangsa lan omahé bakal dadi mulya.

¹¹Ing waktu kuwi Gusti Allah bakal ngangkat tangan-Né menèh perlu nebus turahané umaté Gusti sing ijik ing Asyur lan ing Egipte, ing Patros, ing Etiopia lan ing Elam, ing Sinear, ing Hamat lan ing puluh-puluh ing segara.

¹²Panjenengané bakal ngedekké gendéra kanggo bangsa-bangsa, bakal nglumpukké para wong Israèl sing dibuwang, lan bakal nglumpukké para wong Yéhuda sing kasebar ing pojok papat.

¹³Mèriné Efraim bakal ilang, lan sing ngrusuhi Yéhuda bakal entèk. Efraim ora bakal mèri menèh marang Yéhuda, lan Yéhuda ora bakal ngrusuhi Efraim menèh.

¹⁴Nanging bakal pada mabur mengulon, menyang pèrèng-pèrèngané gunung Filistèn, bakal njukuki sembarangé turunané wétan bebarengan; bakal pada ngrampas Edom lan Moab, lan wong Amon bakal pada teluk.

¹⁵GUSTI bakal ngesat lengkukan segara Egipte karo napasé sing nggosongké, lan ngangkat tangan-Né marang kali Efrat, lan terus digebuk nganti petyah dadi kali pitu, njalari wong terus bisa liwat ora teles sikilé.

¹⁶Terus bakal ana dalan gedé kanggo turahé umaté Gusti sing ijik ing Asyur, kaya sing mbiyèn wis ana kanggo Israèl, waktu pada metu sangka negara Egipte.