Read Caribbean Javanese Yésaya 13 Bible Online

Yésaya 13 - Caribbean Javanese bible

Yésaya 13

¹Utyapané Gusti kanggo Babèl, sing Yésaya, anaké Amos, weruh.

²Masanga gendéra ing gunung sing gundul, mbengok-mbengoka marang para wong kuwi karo swara banter; ngawé-ngawéa supaya kuwi pada mlebu ing gapura-gapurané para wong luhur!

³Aku iki wis mréntah marang para wong sing Tak sutyèkké, wis nyeluk para wong-Ku sing rosa-rosa supaya nindakké paukumané bebendu-Ku, marang para wong-Ku, sing pada sukak-sukak lan gemunggung.

⁴Ana swara ramé ing gunung-gunung, kaya swarané kumpulané wong sing okèh tyatyahé! Swara gembruduké kraton-kraton, lan bangsa-bangsa sing pada nglumpuk! GUSTI sing ngwasani langit lan bumi ijik mriksa para suradadu perang.

⁵Kuwi pada teka sangka negara sing adoh, malah sangka pojokané langit, ya kuwi GUSTI sing nibakké kabèh nesu-Né arep pada ngrusak sak kabèhé bumi.

⁶Pada ngaduh-aduha, awit dinané GUSTI wis tyedak, tekané kuwi kaya pengrusak sangka sing Mahakwasa.

⁷Awit sangka kuwi kabèh tangan bakal dadi lemes, lan atiné saben manungsa bakal ajur,

⁸lan wong-wong bakal pada kagèt. Lara mules lan lara nglairké bakal nibani marang wong-wong mau, pada ngolang-ngaling kaya wong wadon mbayi. Bakal pada pandeng-pandengan karo delek-delek, praupané pada kaya wong sing lara kademen.

⁹Dinané GUSTI teka tanpa welas, karo bebendu lan nesu sing mulat-mulat, arep nggawé sepi mamringé bumi arep ngentèkké wong-wong ing kono sing pada nggawé dosa.

¹⁰Awit lintang-lintang lan golongané ing langit bakal ora pada nylorotké padangé; srengéngé bakal dadi peteng waktu njedul, lan mbulan ora bakal nylorotké padangé.

¹¹Aku bakal mbales penggawé alané ndonya, lan kesalahané wong duraka; gemunggungé wong-wong sing kemendel bakal Tak rampungi, lan kemlèlèté para wong seneng nindes bakal Tak tugeli.

¹²Aku bakal nggawé arangé wong ngungkuli emas tuwa, lan arangé manungsa ngungkuli emas Ofir.

¹³Mulané Aku bakal nggawé gemeteré langit, lan bumi bakal gonjing ngalih sangka panggonané, ya kuwi ing waktu bebenduné GUSTI sing ngwasani langit lan bumi, lan ing dina nesu-Né sing mulat-mulat.

¹⁴Kaya kidang sing diuyak-uyak lan kaya wedus sing ora diengon, kaya mengkono wong-wong bakal pada nolèh marang bangsané déwé-déwé, lan pada mlayu marang negarané déwé-déwé.

¹⁵Saben wong ketyekel bakal disuduk, lan saben wong sing ketyekel bakal ambruk mati karo pedang.

¹⁶Bayi-bayiné bakal pada diremuk ing ngarepé, omah-omahé bakal pada dirampok lan bojo-bojoné bakal pada dityampuri turu.

¹⁷Lah Aku nglurukké wong Madai nglawan marang wong-wong mau, wong-wong sing ora pada perduli marang slaka lan ora seneng marang emas.

¹⁸Panah-panahé bakal nyubles para wong nom; wong-wong mau pada ora bakal welas marang wohé weteng, lan ora pada welas marang botyah-botyah.

¹⁹Lan Babèl, sing dadi apiké para kraton, regané wong Kasdim sing gedé, bakal pada kaya Sodom lan Gomora ya kuwi yèn pada diobrak-abrik karo Gusti Allah:

²⁰ing sak terusé bakal ora ana wong, lan ora ana sing ngenggoni nganti turun-temurun; wong Arab ora bakal ngedekké tarup ing kono, lan para pangon ora bakal nglilani kéwané pada njerum ing kono,

²¹nanging sing bakal njerum ing kono ya kuwi kéwan galak ing ara-ara samun, lan omah-omahé bakal kebak manuk beluk, manuk-manuk unta sing bakal pada manggon ing kono, lan wedus-wedus berok pada jingklak-jingklak;

²²asu alas bakal pada njegok ing kraton-kratoné, lan asu galak ing kraton-kratoné kesenengan. Waktuné bakal gelis teka, lan dina-dinané ora bakal diulur-ulur.