Read Caribbean Javanese Yésaya 16 Bible Online

Yésaya 16 - Caribbean Javanese bible

Yésaya 16

¹Penggedé pangwasané negara, pada ngirimna tyempé kanggo upeti sangka kuta Sela ngliwati ara-ara samun menyang gunung Sion.

²Kaya manuk sing mabur lunga, lan isiné susuh digusah, kaya mengkono anaké wadon Moab ing sabrangané kali Arnon.

³“Ngekèkana pitutur, bélani wewenangé, dadia pangayomé sing iyup ing wayah awan; wong-wong sing dibuwang pada delikna, aja mblénjani wong sing pada mblayu!

⁴Para wong sing dibuwang sangka Moab bèn pada mondok ing panggonanmu, dadia panggonan pandelikané wong-wong kuwi kanggo sing arep ngentèkké! Yèn tumindak peksa wis ora ana, pengrusak wis ora ana lan wong seneng nindes wis entèk sangka negarané,

⁵terus ana dampar sing bakal diedekaké awit sangka kawelasan lan kuwi bakal tansah njagongi ing tarupé Daved karo sakwijiné rèkter sing njejekké keadilan, lan sing gelis-gelis nindakké kabeneran.”

⁶Aku wis pada krungu bab gemunggungé Moab, pantyèn sombong banget kuwi, bab kemlèlèté, gemunggungé lan gemregeté, lan enggoné ngotyèh sing ora bener.

⁷Mulané ya bèn wong Moab ngaduh-aduh kanggo Moab, sing siji awit sangka sijiné, bèn kabèh pada ngaduh-aduh. Awit kèlingan marang kuku kismis sangka Kir-Hareset ya bèn pada sambat lan remuk pisan!

⁸Awit ing kebon-kebon ing Hèsbon lan wit anggur ing Sibma wis pada gloyoran; para sing nyekel pangwasa kanggo bangsa-bangsa wis pada mbabati wit-wité anggur sing betyik déwé, sing mbiyèn ngrambat tekan Yaéser lan mrambat tekan ara-ara samun; pangé pating ngglolor tekan sabrangé segara.

⁹Mulané aku mèlu nangis kaya Yaéser awit sangka wit anggur ing Sibma mau; kowé arep tak telesi karo eluhku, hé Hèsbon lan Eléalé, awit ing waktu ketiga tyotyok ing waktu panèn mungsuhmu nyerang karo bengokan perang.

¹⁰Wis entèk kabungahan lan surak-surak sangka kebon wowohan; wis ilang sangka kebon-kebon anggur swara bungah-bungah lan surak-surak; wis ora ana sing ngidak-idak ing panggonan peresané, Aku wis ngendek bungah-bungahé.

¹¹Awit sangka kuwi kaya uniné siter, ya kaya mengkono jeritané atiku weruh kahanané Moab, lan batinku rontok weruh kahanané Kir-Heres.

¹²Mulané senajan Moab ngabekti lan nglabuhi karo ngrekasa banget ing puntuk pangurbanan lan mlebu ing omah sutyiné perlu ndedonga, ora bakal olèh apa-apa.

¹³Ya kuwi tembung sing diomongké karo GUSTI bab Moab ing waktu kepungkur.

¹⁴Mulané saiki GUSTI ngomong mengkéné: “Ing sak njeruhné telung taun, miturut waktu nyambutgawéné para suradadu sing diupahi, kamulyané Moab karo keraméané sing gedé, bakal dadi tyatyatan lan wong sing kèri bakal setitik banget lan ora kwasa.”