Read Caribbean Javanese Yésaya 17 Bible Online

Yésaya 17 - Caribbean Javanese bible

Yésaya 17

¹Utyapané Gusti kanggo Damaskus. Tenan Damaskus ora bakal tetep dadi kuta, mengko bakal dadi tumpukan jugrukan;

²kuta-kutané bakal disuwungké selawasé lan bakal dadi panggonan kanggo pangonané kéwan-kéwan, sing njerum lan ora diganggu karo sapa-sapa.

³Efraim bakal kélangan bèntèng-bèntèngé, lan pangwasané kraton bakal entèk sangka Damaskus, uga turahé Aram bakal entèk kabèh pada kaya kamulyané wong Israèl, mengkono tembungé GUSTI sing ngwasani langit lan bumi.

⁴Ing waktu kuwi kamulyané Yakub bakal suda, lan kemakmurané bakal susut;

⁵kahanané kaya gandum sing digegem arep dipanèn lan tangané metiki gagangé, utawa kaya gagangé sing dipetik karo wong ing legokané Réfaim.

⁶Kuwi bakal ana turahané kanggo asakan kaya waktu wong nggerok woh saitun, ana siji loro sing kèri ing putyuké, lan ana siji-loro ing pangé, mengkono tembungé GUSTI, Gusti Allahé Israèl.

⁷Ing waktu kuwi manungsa bakal mandeng marang Panjenengané sing nggawé, lan mripaté bakal nyawang marang Sing Mahasutyi, Gusti Allahé Israèl;

⁸ora bakal mandeng marang mesbèh-mesbèh gawéané tangané déwé, lan ora bakal nyawang marang garapané tangané, ya kuwi tugu-tugu brahala lan dupa-dupa.

⁹Ing waktu kuwi kuta-kutamu bakal disuwungké kaya kuta-kutané wong Hèwi lan wong Amori sing pada ditinggal awit sangka wong Israèl, terus dadi sepi mamring.

¹⁰Awit kowé wis lali marang Gusti Allah sing wis ngekèki keslametan marang kowé, lan ora éling marang gunung watu kekuwatanmu. Mulané senajan kowé nggawé taman sing apik sing kok tanduri tyangkokan sangka negara mantya,

¹¹senajan waktu kowé nandur kowé ndadèkké suburé tukulé, lan ing waktu ésuk enggonmu nandur tyangkokan ndadèkké kembangé, nanging panènané bakal gelis entèk ing dinané kasangsaran lan sangsara sing ngidap-idapi.

¹²Tyilaka! Raméné bangsa-bangsa okèh, sing pada ramé kaya ombaké segara sing gemleger! Raméné taler-taleré bangsa, sing pada ramé kaya gembruduké banyu sing ngidap-idapi.

¹³Para taleré bangsa pada ramé kaya gembruduké banyu gedé; nanging GUSTI nggetak karo nesu, sakwat terus pada mlayu adoh, karo kesusu kaya kulit gabah ing penuton sing kabur karo angin, lan kaya dedak disebul karo lésus.

¹⁴Bareng ngarepké soré, lah ana rasa wedi! Sak durungé ésuk, wis ora ana kabèh! Ya kuwi pandumané wong-wong sing pada ngrampoki kita, lan ya kuwi sing ditemtokké kanggo para wong sing ngrampasi kita.