Read Caribbean Javanese Yésaya 19 Bible Online

Yésaya 19 - Caribbean Javanese bible

Yésaya 19

¹Utyapané Gusti kanggo Egipte. Lah, GUSTI numpak mendung sing gelis lan lunga menyang negara Egipte; para brahala ing Egipte pada gemeter ing ngarepé, lan atiné wong Egipte remuk ing awaké.

²Aku bakal nggawé wong Egipte nglawan pada wong Egipte, supaya pada perang, saben wong nglawan seduluré lan saben wong nglawan kantyané, kuta nglawan kuta, kraton nglawan kraton;

³semangaté wong Egipte terus ilang, rantyamané bakal Tak kesruhké; terus bakal pada njaluk tulung marang para brahala lan marang tukang jopa-japu, marang roh pepeteng lan marang rohé tukang ngramal.

⁴Aku bakal ngekèkké wong Egipte ing tangané bendara sing seneng nindes, lan ratu sing kereng bakal ngadili bangsa kuwi; mengkono tembungé Gusti, GUSTI sing ngwasani langit lan bumi.

⁵Banyuné laut Nil bakal entèk, lan segara kuwi bakal dadi asat garing,

⁶terus kalèn-kalèné bakal mambu bosok, lan anak-anaké laut Nil bakal dadi tyetèk lan asat, glagah lan suket bakal pada mati lan ambruk.

⁷Suket ing pinggiré laut Nil lan apa sing disebar ing legokan-legokan laut mau bakal dadi garing, kesebul karo angin lan wis ora ana menèh.

⁸Para tukang nggolèk iwak bakal pada sambat lan susah, ya kuwi sak kabèhé wong sing pada mantying ing laut Nil; sak kabèhé wong sing njala ing kono bakal pada ngenes.

⁹Wong-wong sing nggawé mori lenan bakal pada kewirangan, uga para wong nenun mori putih bakal putyet.

¹⁰Wong sing pada nenun bakal remuk atiné, sak kabèhé buruh bakal sedih atiné.

¹¹Para penggedéné ing Soan kuwi pada bodo-bodo, para tukang rembuké Parao sing wityaksana déwé pada ngekèki tembung sing bodo. Kepriyé kowé pada bisa ngomong marang Parao: “Kula kuwi anaké para wong wityaksana, turunané para ratu ing jaman mbiyèn?”

¹²Endi wong-wongmu sing wityaksana? Kuwi bèn pada ngomong marang kowé lan ngekèki weruh apa sing wis diputus karo GUSTI sing ngwasani langit lan bumi kanggo Egipte.

¹³Para penggedéné ing Soan tumindaké bodo, para penggedéné ing Mèmfis wis pada kapusan; para pengarepé taler-taleré wis pada mbingungké Egipte.

¹⁴GUSTI wis ngesokké ing tengahé sakwijiné roh sing mbingungké, lan kuwi pada nggawé bingungé Egipte ing bab upayané kabèh, nganti kaya wong mendem, tiba ing muntahé déwé.

¹⁵Lan ora ana sing olèh-gawé sak tindakké Egipte sing digawé karo penggedéné lan sing ngetutké, karo pengarep lan wong lumrah.

¹⁶Ing waktu kuwi para wong Egipte bakal pada kaya wong wadon; bakal pada gemeter lan kagèt awit sangka tangané GUSTI sing ngwasani langit lan bumi, sing diagakaké marang wong-wong mau.

¹⁷Negara Yéhuda terus bakal nekaké rasa wedi ing sak tengahé wong Egipte lan sapa waé sing éling marang wong-wong mau bakal kagèt awit krungu bab putusané GUSTI sing ngwasani langit lan bumi, sing wis diputuské kanggo wong-wong kuwi.

¹⁸Ing waktu kuwi ing negara Egipte bakal ana kuta lima sing ngomong nganggo basa Kanaan lan sing sumpah kanggo GUSTI sing ngwasani langit lan bumi. Ana salah siji sing bakal disebut kuta srengéngé.[3]

¹⁹Ing waktu kuwi ing sak tengahé negara Egipte bakal ana mesbèh kanggo GUSTI lan tugu pengéling-éling kanggo GUSTI ing tapel watesé.

²⁰Kuwi bakal dadi tanda paseksi kanggo GUSTI sing ngwasani langit lan bumi ing negara Egipte: yèn pada sambat marang GUSTI awit sangka sing pada nindes, Panjenengané terus bakal ngekèki sakwijiné juruslamet marang wong-wong mau, sing bakal tandang lan ngluwari.

²¹GUSTI bakal ngétokké Panjenengané marang wong Egipte lan wong Egipte ing waktu kuwi bakal kenal marang GUSTI; bakal pada ngabekti karo ngekèki kurban sing dibelèh lan kurban panganan, lan bakal nggawé janji marang GUSTI lan janji kuwi bakal dibayar.

²²Wong Egipte bakal dirangket karo GUSTI, bakal dirangket, terus diwaraské; terus bakal pada mratobat marang GUSTI lan Panjenengané bakal nuruti pandongané lan maraské wong-wong mau.

²³Ing waktu kuwi bakal ana dalan gedé sangka Egipte menyang Asyur, terus wong Asyur bisa mlebu ing Egipte lan wong Egipte bisa mlebu ing Asyur, lan wong Egipte bakal ngabekti bebarengan karo Asyur.

²⁴Ing waktu kuwi Israèl bakal dadi sing kaping telu sakwisé Egipte lan Asyur, sakwijiné berkah ing bumi,

²⁵sing diberkahi karo GUSTI sing ngwasani langit lan bumi karo tembungé: “Kaberkahan kanggo Egipte, umat-Ku lan Asyur, penggawéané tangan-Ku lan Israèl warisan-Ku.”