Read Caribbean Javanese Yésaya 2 Bible Online

Yésaya 2 - Caribbean Javanese bible

Yésaya 2

¹Tembungé Gusti sing dikèkké marang Yésaya, anaké Amos bab Yéhuda lan Yérusalèm.

²Ing pungkasané jaman bakal kelakon: gunung panggonan griyané GUSTI bakal ngadek jejek ing sak nduwuré gunung-gunung lan duwuré ing sak nduwuré puntuk-puntuk; kabèh bangsa bakal gembruduk mbrana

³lan para taleré bangsa okèh sing bakal pada budal karo ngomong mengkéné: “Hayuk, kita pada munggah ing gunungé GUSTI, menyang griyané Gusti Allahé Yakub, supaya Panjenengané ngekèki piwulang marang kita bab dalan-dalan-Né lan supaya kita pada mlaku ing kono; awit sangka Sion bakal dikèkké piwulang lan tembungé GUSTI sangka Yérusalèm.”

⁴Panjenengané bakal dadi rèkter ing antarané para bangsa lan bakal ngadili taleré bangsa okèh; kuwi terus bakal pada nggemblèng pedang-pedangé didadèkké gaman kanggo ngluku lan tumbak-tumbaké didadèkké arit. Bangsa sing siji ora bakal ngangkat pedangé menèh nglawan bangsa sijiné lan ora bakal mulangi perang menèh.

⁵Hé golongan tyedak turunané Yakub hayuk kita pada mlaku ing pepadangé GUSTI!

⁶Tenan Panjenengan wis ngguwak umat Panjenengan ya kuwi golongan turunané Yakub awit ing endi-endi pada nindakké tenungan kaya sing ditandangi ing negara wétan lan sihir kaya wong Filistèn, lan kakèhan wong bangsa mantya ing sak tengahé.

⁷Negarané kebak emas lan slaka lan banda-bandané tanpa kena diitung; negarané kebak kapal lan krétané tanpa kena diitung.

⁸Negarané kebak brahala; wong-wong iki pada sujut nyembah marang penggawéané tangané déwé lan marang sing digarap karo tangané.

⁹Kaya mengkéné anggèné manungsa ditelukké lan anggèné wong dikalahké - wong-wong iki supaya aja dingapura!

¹⁰Mlebua ing sela-selané gunung watu lan ndelika ing rong sak njeruhné lemah supaya utyul sangka nesuné GUSTI lan awit sangka padangé semloroté kamulyan-Né!

¹¹Manungsa sing gemunggung bakal dikalahké lan wong sing sombong bakal didingklukké, mung GUSTI sing Mahaluhur ing dina kuwi.

¹²Awit GUSTI sing ngwasani langit lan bumi netepaké dinané enggoné bakal ngukum sak kabèhé wong sing gemunggung lan sombong lan ngukum marang kabèh wong sing ngunggul-unggulké déwé, perlu diasorké;

¹³ngukum kabèh wit tyemara ing Libanon sing tukul menduwur lan tetep munggah, lan ngukum kabèh wit terbantin ing Basan;

¹⁴lan ngukum gunung sing duwur-duwur lan kabèh puntuk sing munggah;

¹⁵ngukum sak kabèhé menara sing duwur-duwur lan sak kabèhé bèntèng sing dikuwati;

¹⁶ngukum sak kabèhé kapal ing Tarsis lan sak kabèhé kapal sing apik déwé.

¹⁷Manungsa sing gemunggung bakal pada didingklukké lan wong sing sombong bakal pada diasorké; Mung GUSTI sing Mahaluhur ing dina kuwi.

¹⁸Nanging brahala-brahala bakal entèk babar pisan.

¹⁹Ing kono wong bakal mlebu ing guwa-guwa ing gunung watu lan ing rong-rong ing sak njeruhné lemah, awit sangka wediné marang GUSTI lan awit sangka padang semloroté kamulyan-Né, ing waktu Panjenengané nandangi nggawé gemeteré bumi.

²⁰Ing dina kuwi brahala-brahala slaka lan brahala-brahala emas gawèané manungsa sing disembah bakal dibuwang kanggo tikus lan lawa,

²¹lan wong mau bakal mlebu ing growongan-growongané gunung watu lan ing sela-selané puntuk-puntuk watu awit sangka wediné marang GUSTI lan awit sangka padangé semloroté kamulyan-Né; ing waktu Panjenengané ngadek nggawé gemeteré bumi.

²²Aja pada ngendelké marang manungsa, awit wong kuwi ora luwih mung sebulan napas lan wong kuwi terus kudu dianggep kaya apa?