Read Caribbean Javanese Yésaya 21 Bible Online

Yésaya 21 - Caribbean Javanese bible

Yésaya 21

¹Tembungé Gusti kanggo ara-ara samun ing pinggir segara. Kaya lésus enggoné gembrubuk ngliwati negara Negeb, kaya mengkono tekané tyilaka sangka ara-ara samun, sangka negara sing medèni.

²Ana wahyu sing kereng sing wis dikabarké marang aku: “Si rampok ngrampok, tukang ngrusak, ngrusak! Majua, hé Elam, kepungen, hé Madai! Kabèh nggresah sing digawé wis Tak sirep.”

³Mulané wetengku lara banget, aku lara mules kaya mulesé wong wadon sing arep mbayi; aku mbungkuk-mbungkuk, ora krungu menèh, aku kagèt, ora weruh menèh.

⁴Atiku ngolang-ngaling, aku dikwasani karo rasa tratapan, wayah mbengi sing tansah tak angen-angen kuwi saiki nggawé gemeterku.

⁵Wong pada ramé nata suguhan, nata jagongan, panganan, ombènan. Dadakan krungu: “Hé para penggedéné! Tata-tataa perang, lenganana tamèngé!”

⁶Awit mengkéné tembungé Gusti marang aku: “Kowé lungaa, masanga wong jaga, apa sing dideleng kudu diomongké.

⁷Yèn weruh suradadu numpak jaran, loro-loro, suradadu numpak kimar, suradadu numpak unta, kuwi kudu digatèkké tenan, karo ati-ati banget.”

⁸Nanging penjaga kuwi kudu mbengok: “Ing panggung jagan, duh bendara kula, kula tansah ngadek sedina muput, lan ing panggonan jagan kula dipanjer ing saben wengi.”

⁹Lah kuwi wis ana suradadu sak kumpulan sing teka, suradadu sing numpak jaran! Wong mau terus mbengok menèh: “Wis ambruk, Babèl wis ambruk, lan kabèh retyané brahala wis diremuk lan pating slebar ing lemah.”

¹⁰Hé bangsaku sing wis diidak-idak lan diidak-idak apa sing aku krungu sangka GUSTI sing ngwasani langit lan bumi, Gusti Allahé Israèl, wis tak kabarké marang kowé.

¹¹Utyapané Gusti kanggo Duma. Ana wong sing mbengok marang aku sangka Seir: “Hé wong jaga, apa benginé ijik suwé? Hé wong jaga, apa benginé ijik suwé?”

¹²Wong jaga kuwi nyauri: “Bakal ésuk, nanging uga bakal mbengi. Yèn kowé pada arep takon, tekaa lan pada takona sepisan menèh!”

¹³Utyapané Gusti kanggo negara Arab. Kowé bakal pada nginep ing alas ing negara Arab, hé para pedagang wong Dédan!

¹⁴Hé wong sing manggon ing negara Tema, pada metua, wong sing ngelak wènèhana banyu, wong sing mblayu petuken karo roti.

¹⁵Awit wong kuwi pada mlayu nyingkiri pedang, ya pedang sing landep, gendéwané sing dipentèng, lan peperangan sing medèni.

¹⁶Awit mengkéné tembungé Gusti marang aku: “Sak njeruhné setaun menèh, miturut waktu nyambutgawéné suradadu sing diupahi, kabèh kamulyané Kedar bakal entèk.

¹⁷Lan suradaduné tukang manah bangsa Kedar sing gagah rosa-rosa bakal mung kèri setitik tyatyahé, awit GUSTI, Gusti Allahé Israèl wis ngomong mengkono.”