Read Caribbean Javanese Yésaya 23 Bible Online

Yésaya 23 - Caribbean Javanese bible

Yésaya 23

¹Utyapané Gusti kanggo Tirus. Ngaduh-ngaduha, hé kapal Tarsis, awit Tirus wis rusak, omahmu utawa babakan kapalmu wis ora ana! Waktu ijik pada ing negarané wong Siprus bab kuwi wis dikrungu.

²Pada delek-deleka, hé sing pada manggon ing pinggirané segara, hé pedagang Sidon, kongkonanmu pada nyabrang ing segara, lan nyabrang ing segara gedé;

³barang-barang sing dilebokké marang Sidon ya kuwi gandum sangka Sihor, lan pametuné bawah Nil, terus kuta kuwi dadi pasar kanggo para bangsa.

⁴Ngalamana kisinan, hé Sidon, awit segara, bèntèngé segara, muni mengkéné: “Aku ora tau lara lan ora tau mbayi, aku ora tau ngrumati jaka lan ora tau ngrumati prawan-prawan.”

⁵Yèn kabar bab Tirus kuwi tekan Egipte, wong-wong bakal pada gemeter krungu bab kuwi.

⁶Pada mblayua menyang Tarsis, pada sambata, hé sing pada manggon ing negara pinggirané segara!

⁷Iki apa kutamu sing bungah-bungah, sing asal-usulé sangka jaman mbiyèn? Wong wis pada lunga menyang panggonan sing adoh lan dadi wong mantya ing kana.

⁸Sapa sing mutusi mengkéné iki kanggo Tirus, kuta sing tau ngekèki makuta, sing pedagang-pedagangé para penggedéné lan wong-wongé sing dagang para wong mulya ing bumi?

⁹GUSTI sing ngwasani langit lan bumi, wis nggawé putusan mengkono kanggo ngentèkké kesombongan, kanggo ngasorké sak kabèhé sing apik lan sak kabèhé wong mulya ing bumi.

¹⁰Garapen kebonmu kaya ing pinggir kali Nil, hé wong Tarsis, ing panggonan kanggo ndandani kapal wis ora ana!

¹¹GUSTI wis ngatungké tangan-Né marang segara lan nggawé kraton-kraton pada gemeter; Panjenengané wis mréntah supaya bèntèngé Kanaan pada dientèkké.

¹²Lan wis ngomong: “Kowé ora bakal bungah-bungah menèh, hé prawan sing wis dirusak, hé anak wadoné Sidon! Ngadeka, mblayua marang wong Siprus! Ing kono uga bakal ora ana panggonan sing nyenengké kanggo kowé.”

¹³Delengen negarané wong Kasdim! Ya bangsa kuwi sing nindakké mengkono, duduk wong Asyur. Kuwi sing pada ngekèkké Tirus marang kéwan-kéwan ing ara-ara samun; kuwi wis pada ngedekké menara-menara kanggo ngepung lan wis ngentèkké gapura-gapurané kuta kuwi lan ndadèkké gempuran kuta kuwi.

¹⁴Sambata, hé kapal-kapal Tarsis, awit bèntèngmu wis dirusak.

¹⁵Ing waktu kuwi Tirus bakal ora diéling pitung puluh taun suwéné, pada karo umuré ratu. Sakwisé pitung puluh taun, Tirus bakal ngalami apa sing ditibakké marang wong wadon lonté sing kamot ing kidungan iki:

¹⁶“Nggawaa siter, ngubengana kuta, hé wong lonté sing wis dilalèkké! Unèkna sing apik, ngidunga sing werna-werna, supaya kowé diéling karo wong.”

¹⁷Lan sakwisé kliwat pitung puluh taun, GUSTI bakal mikir marang Tirus, terus nampa upahé sing njijiki menèh, lan terus bakal nandangi ala menèh karo kabèh kraton ing sak lumahé bumi.

¹⁸Batiné lan upahé sing njijiki bakal sutyi kanggo GUSTI, ora bakal diendek utawa disimpen, nanging batiné kuwi bakal kanggo nganakké pangan sing tyukup lan sandangan sing apik kanggo para wong sing pada manggon ing ngarepé GUSTI.