Read Caribbean Javanese Yésaya 24 Bible Online

Yésaya 24 - Caribbean Javanese bible

Yésaya 24

¹Lah bumi bakal didadèkké suwung karo GUSTI lan bakal dilebur, lemahé bakal kuwalik, lan sing manggon bakal pada dibuyarké.

²Nasipé imam bakal kaya rayat, nasipé bendara lanang bakal kaya batur lanang, nasipé bendarané wadon bakal kaya batur wadon, nasipé wong sing adol bakal kaya sing tuku, nasipé wong sing nyilihké bakal kaya sing nyilih, nasipé wong ngutangi bakal kaya sing utang.

³Bumi bakal didadèkké ludes babar pisan, lan bakal dirampas entèk-entèkan, awit GUSTI sing ngomong mengkono.

⁴Bumi kétok susah alum, malah ndonya terus gloyoran alum, para penggedéné ndonya pada garing kekuwatané.

⁵Bumi dadi reget awit sangka sing ngenggoni, awit pada nglanggar angger-angger, ngowahi katetepan lan nyélaki perjanjian sing langgeng.

⁶Mulané bumi bakal dipangan karo bebendu, lan sing ngenggoni bakal olèh paukuman; awit sangka kuwi sing ngenggoni bumi bakal entèk, lan manungsa bakal kèri setitik.

⁷Anggur ora nggawé seneng menèh, wité anggur keranta-ranta, lan wong sing bungah atiné bakal sambat.

⁸Swarané terbangan sing nyenengké wis lèrèn, raméné wong sing bungah-bungah wis sirep, lan swarané siter sing nyenengké wis lèrèn.

⁹Wong sing ngombé anggur ora karo kidungan menèh, ombèn keras dadi pait kanggo wong sing ngombé.

¹⁰Kuta sing késruh kahanané wis lebur, saben omah wis tutupan ora kena dileboni.

¹¹Wong pada njerit ing dalan awit ora ana anggur, kabèh kesenengan wis entèk, senengé bumi wis ilang.

¹²Sing ketemu ing kuta mung karusakan, gapurané wis digempur lan ambruk.

¹³Awit iki bakal kelakon ing bumi, ing sak tengahé para bangsa, ya kuwi kaya ing waktu wong nggerok woh saitun, kaya ing waktu ngasak ing sak rampungé panèn anggur.

¹⁴Wong-wong pada surak-surak banter, awit sangka kaluhurané GUSTI, pada mbengok banter sangka sisih kulon:

¹⁵“Mulané GUSTI dimulyakké ing negara-negara wétanan, asmané GUSTI, Gusti Allahé Israèl, ing tanah-tanah ing pinggir segara!”

¹⁶Sangka pojokané bumi aku pada krungu kidungan: “Kamulyan kanggo Sing Mahaadil!” Nanging aku ngomong: “Aku kuru keranta-ranta, kuru keranta-ranta aku. Tyilaka aku! Awit para rampok pada ngrampok, malah tanpa lèrèn enggoné ngrampok!”

¹⁷Hé para sing manggon ing bumi, kowé bakal pada katekan karo rasa wedi, bakal pada ketyemplung ing luweng lan kena karo kala jiret.

¹⁸Ing kono sapa sing mlayu awit sangka swara sing ngagètké kuwi bakal ketyemplung ing luweng, lan sing munggah sangka luweng bakal kena karo kala jiret. Awit tyendéla-tyendélané langit bakal pada dibukak lan dasar-dasaré bumi bakal pada gonjing.

¹⁹Bumi remuk bubuk, bumi gempur ajur bumi gonjang-ganjing.

²⁰Bumi gloyoran kaya wong mendem lan gonjing kaya gubuk disebul karo angin; dosané mbruntaké nibani nemen, mulané terus ambruk lan ora bakal ngadek menèh.

²¹Ing waktu kuwi GUSTI terus bakal ngukum suradadu-suradaduné langit ing langit lan para ratuné bumi ing bumi.

²²Kuwi bakal pada diklumpukké bebarengan, kaya paukuman sing dilebokké ing luweng; bakal pada dilebokké ing paukuman lan bakal pada diukum ing waktu sing suwé.

²³Mbulan bunder bakal rumangsa isin, lan srengéngé sing panasé ngidap-idapi bakal ngalami kisinan, awit GUSTI sing ngwasani langit lan bumi bakal dadi Ratu ing gunung Sion lan ing Yérusalèm, lan bakal ngétokké kamulyan-Né ing ngarepé para pemimpiné umaté.