Read Caribbean Javanese Yésaya 25 Bible Online

Yésaya 25 - Caribbean Javanese bible

Yésaya 25

¹Duh GUSTI, Panjenengan sing dadi Gusti Allah kula; kula bakal ngluhurké Panjenengan, bakal ngidungké kidung maturkesuwun kanggo asma Panjenengan; awit karo setia lan kekuwatan enggèn Panjenengan, nindakké rantyaman sing nggumunaké sing wis ana wiwit mbiyèn.

²Awit kuta kuwi wis Panjenengan dadèkké tumpukan watu, lan bèntèngé kuwi dadi ambruk; gapurané bangsa mantya wis duduk kuta menèh, lan ora bakal dibangun menèh sak lawasé.

³Mila salah sijiné bangsa sing kuwat bakal ngluhurké Panjenengan; kutané para bangsa sing rosa-rosa bakal wedi-asih marang Panjenengan.

⁴Awit Panjenengan dadi panggonan pangungsèné para wong sing mlarat, dadi panggonan pangungsèné wong mlarat ing njeruhné kasusahané, dadi pengayoman kanggo anané lésus, dadi pangayomé yèn nalika panas tenan, awit nesuné para wong sing rosa-rosa lan gemunggung kuwi kaya lésus ing waktu adem,

⁵kaya panas banter ing panggonan garing. Raméné para wong mantya Panjenengan endek; kaya panas tenan sing dientèkké karo iyupé mendung, ya mengkono kidungané para wong sing rosa-rosa gemunggung disirep.

⁶GUSTI sing ngwasani langit lan bumi ing gunung Sion kéné bakal nganakké pésta kanggo kabèh bangsa rupa olah-olahan sing énak, pésta sing rupa anggur lawas, olah-olahan sing énak lan karo sungsum, anggur lawas sing disaring endek-endeké.

⁷Lan ing gunung kéné Gusti bakal nyuwèk-nyuwèk sandangan salin kasusahan sing dienggoké marang kabèh taleré bangsa lan kemul sing dikemulké marang kabèh para bangsa.

⁸Panjenengané bakal ngilangi pati ing sak terusé; Gusti Allah, GUSTI bakal ngusapi eluh sangka kabèh praupan; lan kewirangané umaté bakal didohké sangka sak lumahé bumi, awit GUSTI wis ngomong mengkono.

⁹Ing waktu kuwi bakal ana wong sing ngomong: “Iki tenan Gusti Allah kita, sing kita entèn-entèni, supaya kita dikèki slamet. Ya iki GUSTI sing kita entèn-entèni; hayuk kita pada surak-surak lan sukak-sukak awit sangka keslametan sing dikèkké!”

¹⁰Awit tangané GUSTI bakal ngayomi gunung iki, nanging Moab bakal diidak-idak ing panggonané déwé, kaya damèn sing diidak-idak ing juglangan reget.

¹¹Yèn Moab megarké tangané ing njeruhné kaya tyarané wong nglangi sing megarké tangané supaya bisa nglangi, GUSTI terus bakal ngasorké kemlèlèté uga sak kabèhé budidayané.

¹²Kekuwatané témbokmu sing duwur bakal dirubuhké lan diambrukké, lan diglimpangké ing lemah lan lebu.