Read Caribbean Javanese Yésaya 27 Bible Online

Yésaya 27 - Caribbean Javanese bible

Yésaya 27

¹Ing waktu kuwi GUSTI bakal nibakké paukuman karo pedangé sing atos, gedé lan kuwat marang Léwiatan, ula sing mlayu, marang Léwiatan, ula sing ngleker, lan bakal matèni monster ula ing segara.

²Ing waktu kuwi bakal diomongké: “Ngidunga bab kebon anggur sing apik!

³Aku, GUSTI sing njaga; Aku sing tansah nyirami. Supaya aja ana wong sing ngrusuhi, awan wengi Tak jaga;

⁴Aku wis ora nesu. Yèn Aku weruh eri lan suket, kuwi bakal Tak perangi lan bakal Tak obong bareng,

⁵kejaba yèn terus pada nggolèki pengayoman nang enggon-Ku lan ngupaya rukun karo Aku, ya ngupaya rukun karo Aku!”

⁶Ing dina sing bakal kelakon, Yakub bakal metu oyoté, Israèl bakal tukul lan metu trubusané lan bakal ngebaki bumi kabèh karo pametuné.

⁷Apa GUSTI enggoné ngentèkké umaté kaya enggoné ngentèkké wong sing ngentèkké umat mau? Utawa apa enggoné matèni umaté kaya enggoné matèni wong sing matèni umaté mau?

⁸Panjenengan wis nglawan wong-wong iki, pada Panjenengan lungakké lan Panjenengan tundung. Wis pada disingkirké karo angin sing banter waktu angin wétan.

⁹Mengkéné iki enggoné kesalahané Yakub diilangi, lan iki wohé yèn dosané wis didohké: terus nggawé sak kabèhé watuné mesbèh kaya watu kapur sing dipetyah-petyah, terus ora ana menèh tugu brahala lan pedupan sing ijik ngadek.

¹⁰Awit kuta rosa kuwi panggonané mentyil, sakwijiné panggonan sing disuwungké lan ditinggal kaya ara-ara samun; pedèt bakal nyenggut suket lan njerum ing kono lan ngentèkké pangé wit-witan.

¹¹Yèn pangé sing tyilik-tyilik wis garing, bakal pada disempali; terus diobong karo para wong wadon sing pada teka. Awit iki sijiné bangsa sing tanpa pikiran, ya kuwi sing njalari ora dikèki katrésnan karo sing nggawé lan ora ditrésnani karo sing mbangun.

¹²Ing waktu kuwi GUSTI bakal nindakké pemilihan wiwit ing kali Efrat nganti tekan kali Egipte, lan kowé kabèh bakal pada diklumpukké siji-sijiné, hé wong Israèl!

¹³Ing waktu kuwi trompèt sing gedé bakal diunèkké, lan sing ilang ing negara Asyur bakal pada teka, mengkono uga sing dibuwang menyang negara Egipte pada sujut nyembah marang GUSTI ing gunung sing sutyi, ing Yérusalèm.