Read Caribbean Javanese Yésaya 28 Bible Online

Yésaya 28 - Caribbean Javanese bible

Yésaya 28

¹Tyilaka para penggedé sing gemunggung, para tukang mendem ing Efraim, sing umuk kanggo kutané: - ya kuwi kuta ing nduwur, ing legokan sing subur, sing kebak wong karo seneng ngombé anggur, sing wis pada mumet! Nanging kuta, makuta sirahé sing apik kuwi kembang sing wis alum.

²Mung Gusti Allah sing nduwèni sakwijiné wong rosa lan kuwat, wong sing kaya lésus tyampuran udan krikil, ya kuwi lésus sing ngrusak wong sing kaya lésus tyampuran udan sing ngidap-idapi lan melèké; wong-wong mau bakal dikeplèkké ing bumi karo rosa.

³Makutané kamulyané para wong Efraim sing seneng mendem kuwi bakal diidak-idak,

⁴kaya kembang sing wis wiwit alum, ing makuta sirahé sing apik-apik kuwi - ya kuwi kuta ing nduwur gunung, ing legokan sing subur - kuwi kahanané bakal kaya woh anjir sing mateng sak durungé waktu ketiga: ijik waé wong weruh terus dipetik lan diemplok.

⁵Ing waktu kuwi GUSTI sing ngwasani langit lan bumi, bakal ngadek dadi makutané sing apik, lan makuta kembang sing apik kanggo turahané umaté,

⁶bakal ngadek dadi rohé keadilan kanggo wong sing lungguh nindakké pengadilan, lan dadi rohé kekuwatan kanggo wong sing ngundurké perang nganti tekan gapura.

⁷Nanging senajan wong-wong ing kéné ya pada mumet awit sangka anggur lan ngelu awit sangka ombèn keras Imam utawa nabi mumet awit sangka ombèn keras, bingung awit sangka anggur; pada mumet awit sangka ombèn keras, mumet waktu weruh wahyu, senpoyongan waktu ngekèki putusan.

⁸Lah méjané kabèh kebak utah-utahan lan reget, terus ora ana sing resik menèh.

⁹Wong terus ngomong: “Sapa sing arep diwulangi bab kaweruhé lan sapa sing bakal diwènèhi ngerti bab wahyu-wahyuné? Kaya botyah tas disapih sing ijik dibetot sangka mèlek!

¹⁰Awit kudu iki kudu kuwi, kudu mengkéné kudu mengkono, tambah iki, tambah kuwi!”

¹¹Lah lantaran para wong sing omongé anèh lan lantaran para wong sing nggunakké basa mantya Panjenengané bakal ngekèki tembungé marang bangsa iki,

¹²Panjenengané sing wis omongi mengkéné: “Ya iki panggonan lèrèn, kowé ngekèkana panggonan kanggo ngasuh marang wong sing kesel banget; kuwi panggonan kanggo ngasuh!” Nanging pada ora gelem ngrungokké.

¹³Mulané bakal pada ngrungokké tembungé GUSTI mengkéné: “Kudu iki, kudu kuwi, kudu mengkéné, kudu mengkono, tambah iki, tambah kuwi!” supaya sak njeruhné mlaku terus pada tiba mlumah, terus tatu, ketyekel lan diukum.

¹⁴Mulané rungokna tembungé GUSTI, hé para wong sing pada seneng nyatyat, hé para wong sing mréntah rayat ing Yérusalèm iki!

¹⁵Awit kowé wis pada ngomong: “Kita wis pada nganakké perjanjian karo pati, lan karo ndonyané pati kita wis pada nganakké pasetujuan; senajan petyut tyetar-tyetèr banter, ora bakal ngenèngi kita; awit si goroh wis pada dadi pangayoman kita, lan kita pada ndelik ing ngapus,”

¹⁶mulané mengkéné tembungé GUSTI: “Aku mernahké ing Sion sakwijiné watu, watu sing wis ketitik betyik kanggo dasaré, watu pojokan sing larang, dasaré sing kuwat: sapa sing pertyaya, ora bakal dek-dekkan!

¹⁷Lan keadilan bakal Tak dadèkké tali ukuran, lan kabeneran Tak dadèkké tali sipat; udan watu bakal ngentèkké pengayoman goroh, lan banyu gedé bakal ngéntérké pandelikan.”

¹⁸Perjanjianmu karo pati bakal diilangi, lan pasetujuanmu karo ndonyané wong mati ora bakal terus; yèn petyut tyetar-tyetèr banter, kowé bakal pada remuk diidak-idak.

¹⁹Kaping pira waé enggonmu teka, kowé bakal pada kesèrèt, awit kuwi bakal teka saben ésuk, ing wantyi awan lan ing wantyi mbengi; lan ngerti marang tembungé sing kok rungokké kuwi kowé mung nduwé rasa wedi tok.

²⁰Awit peturonmu bakal kurang dawa yèn kanggo turu slonjor lan kemulé bakal kurang amba kanggo ngemuli awak.

²¹Awit GUSTI bakal ngadek kaya ing gunung Perasim, lan bakal mbendu kaya ing legokan sak tyedaké Gibéon, lan bakal nindakké penggawéan-Né - anèh penggawéan-Né kuwi; lan bakal nindakké penggawéan-Né - ngidap-idapi penggawéan-Né kuwi!

²²Mulané kowé aja pada nyatyat, supaya taliné bandamu aja mundak kentyeng, awit aku krungu bab karusakan sing wis ditentokké sing tekané sangka Gusti Allah, GUSTI sing ngwasani langit lan bumi bakal nibani sak kabèhé negara kuwi.

²³Rungokna lan rungokna swaraku; gatèkna lan rungokna tembungku!

²⁴Apa saben dina wong kuwi enggoné ngluku, matyuli lan nggaru lemahé sing bakal disebari wiji?

²⁵Apa ora sakwisé lemahé dirata, enggoné ngratakké jinten ireng lan nyebar jinten putih, nguluri gandum lan gandum tyilik lan wiji liyané ing pinggiré?

²⁶Bab adat kulinané wis dikèki piwulang, lan pituduh karo Gusti Allahé.

²⁷Awit jinten ireng ora dirontoké nganggo piranti kanggo ngrontok, lan glindingané grobak ora kanggo nggiles jinten putih, nanging jinten ireng dirontoké karo tyara digepuki karo tyutik, lan jinten putih karo gebuk.

²⁸Apa wong enggoné ngiles gandumé digebuki nganti ajur? Mesti ora, ora terus waé digebuki nganti ajur! Lan senajan wongé nglakokké grobak lan jarané ing nduwuré gandum mau, wongé ngerti enggoné ngiles ora bakal nganti ajur.

²⁹Lan iki tekané uga sangka GUSTI sing ngwasani langit lan bumi; putusané kuwi nggumunaké lan gedé kawityaksanané.