Read Caribbean Javanese Yésaya 29 Bible Online

Yésaya 29 - Caribbean Javanese bible

Yésaya 29

¹Tyilaka Arièl, Arièl, kuta panggonan tarup-tarupé Daved! Taun nggantèni taun riyaya bèn terus-terusan dianakké.

²Aku bakal nggawé susahé Arièl, terus wong pada sambat lan ngaduh-aduh, lan kuta kuwi bakal kaya pawon kanggo Aku.

³Aku bakal masang tarup ing kabèh kéblat ngepung kowé, lan nggawé panggung-panggung penjagan kanggo mèpètké kowé, uga bakal ngedekké pager-pager kanggo ngepung kowé.

⁴Ing kono kowé bakal ngasorké awakmu lan kowé terus nyuwara sangka sak njeruhné bumi, tembung-tembungmu krungu lamat-lamat sangka sak njeruhné lebu; swaramu uniné bakal kaya swarané roh préwangan sangka sak njeruhné lemah, lan tembung-tembungmu bakal krungu kaya bisik-bisikan sangka sak njeruhné lebu.

⁵Nanging sak kabèhé suradadu mungsuhmu bakal entèk ilang kaya awu sing lembut, lan sak kabèhé wong sing rosa-rosa gemunggung bakal dadi kaya kulit gabah sing mawut kabur. Awit dadakan sak kedèpé mripat,

⁶kowé bakal weruh tekané GUSTI sing ngwasani langit lan bumi ing njeruhné gluduk, lindu lan swara sing ngidap-idapi, ing njeruhné lésus lan prahara lan ing njeruhné geni sing ngobong nganti resik.

⁷Kabèh suradaduné para bangsa sing perang nglawan Arièl, lan sak kabèhé wong sing merangi kuta kuwi uga bèntèngé lan para wong sing ngrusuhi bakal kaya impèn lan kaya wahyu ing wantyi mbengi;

⁸kaya wong ngelih sing ngimpi ijik mangan, bareng tangi wetengé ijik kosong, utawa kaya wong ngelak sing ngimpi ijik ngombé, bareng tangi nyatané ijik kesel, gorokané ijik ngelak, kaya mengkono bakal kedadiané sak kabèhé suradadu para bangsa sing perang nglawan gunung Sion.

⁹Pada mlongo karo kebak nggumunaké, mripatmu bèn merem lan lamur! Pada mendema, nanging ora awit sangka anggur, pada mumeta, nanging ora awit sangka ombèn keras!

¹⁰Awit GUSTI wis ndadèkké kowé pada turu kepati; mripatmu - ya kuwi para nabi - wis meremaké lan praupanmu - ya kuwi para wong tukang ndelok - wis dikudungi.

¹¹Kanggo kowé kabèh wahyu kuwi mau kaya isiné kitab sing diségel, yèn kuwi diwènèhké marang wong sing bisa matya karo diomongi: “Kuwi watyanen,” wong mau bakal nyauri: “Aku ora bisa matya, awit kitab kuwi diségel,”

¹²lan yèn kitab kuwi diwènèhké marang wong sing ora bisa matya karo diomongi: “Iki watyanen,” wong kuwi bakal nyauri: “Aku ora bisa matya.”

¹³Lan Gusti Allah wis ngomong mengkéné: “Awit bangsa iki teka mung karo tutuké lan ngluhurké Aku mung karo lambéné, nanging atiné ngedohi Aku, lan enggoné ngabekti marang Aku kuwi mung awit sangka préntahé manungsa sing diapalaké,

¹⁴mulané Aku bakal nindakké mujijat marang bangsa iki, mujijat sing ngidap-idapi; kawityaksanané para wong sing wityaksana bakal ilang, lan kepinterané para wong sing pinter bakal ndelik.”

¹⁵Tyilaka wong sing ndelikké rantyamané ing ngarepé GUSTI, sing penggawé-penggawéné dilakoni ing pepeteng karo ngomong: “Sapa sing weruh kita lan sapa sing nitèni kita?”

¹⁶Kepriyé ta, kowé kok pada molak-maliké samubarang kabèh? Apa lempung iki kena dianggep pada karo tukang kendi, terus sing digawé bisa ngomong bab sing nggawé: “Duduk wong kuwi sing nggawé aku,” lan apa sing dibangun bisa ngomongké bab sing mbangun: “Wong kuwi ora ngerti apa-apa?”

¹⁷Apa ora mung kurang sedilut, enggoné Libanon bakal malih dadi kebon wowohan, lan kebon wowohan bakal dianggep alas?

¹⁸Ing waktu kuwi para wong budek bakal pada krungu tetembungan sangka sakwijiné kitab, awit sangka wis luwar sangka klimengan lan pepeteng mripaté para wong lamur bakal weruh.

¹⁹Para wong sing ngalami sangsara ing njeruhné GUSTI bakal mundak banget enggoné seneng-seneng, lan para wong mlarat ing sak tengahé para manungsa bakal surak-surak awit sangka sing Mahasutyi, sangka Israèl!

²⁰Awit wong sing kuwat lan gemunggung bakal ora ana lan tukang nindes bakal entèk, lan sak kabèhé wong sing nduwé kekarepan ala bakal dientèkké,

²¹ya kuwi para wong sing angger waé ngarani wong liyané nindakké dosa ing sakwijiné perkara, sing masang kala jiret marang wong sing ngélingké ing gapura, lan sing ndesek wong bener karo sing ora-ora.

²²Awit sangka kuwi mengkéné tembungé GUSTI, Gusti Allahé turunané Yakub, ya kuwi sing wis ngluwari Abraham: “Wiwit saiki Yakub ora bakal kewirangan menèh lan praupané ora bakal putyet menèh.

²³Awit waktu wong-wong mau, ya kuwi turunané Yakub, pada ndeleng apa sing ditindakké karo tangan-Ku ing sak tengahé, terus bakal pada nyutyèkké asma-Ku; bakal pada nyutyèkké sing Sutyi, Gusti Allahé Yakub lan bakal pada gemeter ing ngarepé Gusti Allahé Israèl;

²⁴para wong sing pikirané kesasar, bakal pada olèh pangertèn, lan para wong sing grundelan bakal pada nampa piwulang.”