Read Caribbean Javanese Yésaya 3 Bible Online

Yésaya 3 - Caribbean Javanese bible

Yésaya 3

¹Lah, Gusti, GUSTI sing ngwasani langit lan bumi, tenan bakal ngedohké sangka Yérusalèm lan Yéhuda marang saben wong sing pada diendel-endelké, sak kabèhé tandon pangan lan banyu:

²Pahlawan lan suradadu, rèkter lan nabi, tukang tenung lan pinituwa,

³wong sing luhur lan penggedéné, juru pituduh lan wong pinter tukang sihir, lan tukang jopa-japu.

⁴Aku bakal ngangkat para nom-noman Tak dadèkké pemimpiné, lan botyah-botyah sing bakal pada ngwasani.

⁵Bangsa kuwi terus bakal desek-desekan wong pada lawan-lawanan, sing siji nglawan marang sijiné; wong nom bakal nggetak-nggetak marang wong tuwa, wong asor marang wong sing kajèn lan luhur.

⁶Nganti yèn ana wong sing nyekel seduluré ing omahé bapaké karo ngomong: “Sampéyan ijik nduwé jubah, mila gelema dadi penggedéné kita kabèh lan jugrukan kuwi terus kwasanana,”

⁷ing waktu kuwi seduluré terus bakal nyauri: “Aku emoh dadi dokter; ing omahku ora ana roti lan ora ana jubah; aja ngangkat aku dadi penggedéné bangsa.”

⁸Yérusalèm tenan wis ambruk lan Yéhuda wis ambruk, awit tembung-tembungé lan penggawéné nglawan marang GUSTI lan pada njajal mripaté Gusti sing mulya.

⁹Sloroté praupané ngomongké penggawé alané lan kaya wong Sodom, blak-blakan nduduhké dosané, ora didelikké menèh. Tyilaka wong-wong kuwi! Awit pada nggawé tyilakané awaké déwé.

¹⁰Omongna yèn wong bener kuwi rahayu! Awit bakal mangan wohé penggawéné.

¹¹Tyilaka wong duraka kuwi! Bakal katekan tyilaka, awit bakal diwales miturut penggawéné déwé.

¹²Nanging umat-Ku, sing nyekel pangwasané botyah-botyah, lan bakal dipréntah karo para wong wadon. Hé umat-Ku, para pemimpinmu kuwi pada nasarké kowé, lan dalan sing pada kok liwati kuwi dibingungké!

¹³GUSTI bakal njagong nggawa pengadilan lan ngadek perlu ngadili para bangsa.

¹⁴GUSTI nindakké dadi Rèkter kanggo para pinituwa lan para pemimpiné umaté Piyambaké: “Kowé sing pada ngrusak kebon anggur kuwi, barang rayahané sangka wong sing ditindes ing omahmu tumpuk-tumpuk.

¹⁵Kenèng apa kowé pada nyiksa umat-Ku lan nglarani para wong sing ditindes?” Mengkono tembungé Gusti Allah, GUSTI sing ngwasani langit lan bumi.

¹⁶GUSTI ngetokké tembung: Awit wong wadon ing Sion wis pada gemunggung lan pada mlaku karo langak-langak guluné lan karo ngedèp-ngedèpké mripat, lan mlakuné digawé-gawé karo gelangé sikil sing kemrintying,

¹⁷mulané Gusti Allah bakal ndadèkké sirahé putri Sion pada kebak borok lan GUSTI bakal nyukur rambuté ing sisihé batuké.

¹⁸Ing waktu kuwi Gusti Allah bakal nyingkirké kabèh barang rerégané: gelang sikil, jamang lan mbulan-mbulanan,

¹⁹rerékan kuping, gelang tangan lan kudungé,

²⁰kudung sirah, gelang ranté sikil, tyenting, wadah wewangèn lan jimat-jimat;

²¹ali-ali ségel lan anting-anting irung;

²²sandangan pésta, jubah, sléndang lan tas;

²³pengilon, kotang mori lenan, serban lan klambi njaba.

²⁴Ing kono lenga wangi-wangian apik bakal diganti sing bosok, sabuk bakal diganti tali, rambut klabangan diganti gundul, sandangan pésta diganti salin kasusahan rupa ayu diganti tyap obongan èlèk.

²⁵Wong-wongmu bakal pada mati karo pedang, lan para pahlawanmu awit perang.

²⁶Gapura-gapurané Sion bakal sambat-sambat lan kasusahan, lan kuta kuwi bakal kaya wong wadon wuda sing nglésot ing lemah.