Read Caribbean Javanese Yésaya 31 Bible Online

Yésaya 31 - Caribbean Javanese bible

Yésaya 31

¹Tyilaka para wong sing lunga menyang negara Egipte njaluk tulung, sing ngendelké marang jaran, sing pertyaya marang krétané sing okèh banget, lan marang suradadu numpak jaran sing tyatyahé okèh banget, nanging ora ndangak marang sing Mahasutyi, Gusti Allahé Israèl, lan ora nggolèki GUSTI.

²Nanging Panjenengané sing wityaksana kuwi bakal nekakké tyilaka, lan ora nggèrèt menèh tembungé; Panjenengané bakal tandang nglawan marang wong duraka, lan nglawan marang para suradadu bantuané para wong sing seneng nindes.

³Awit wong Egipte kuwi manungsa, duduk Gusti Allah, lan jaran-jaran kuwi titah urip sing ringkih, duduk roh sing kanggonan pangwasa. Yèn GUSTI ngatungké tangan-Né, sing ngréwangi terus keplèsèt lan sing diréwangi terus tiba, lan kabèh terus pada mati bebarengan.

⁴Awit mengkéné tembungé GUSTI marang aku: “Kaya singa utawa singa nom sing nggereng-nggereng ngwasani memangsané, lan ora wedi krungu gembar-gemboré pangon sak golongan sing diklumpukké arep nglawan, lan ora mundur karo raméné, ya mengkono bakal meduné GUSTI sing ngwasani langit lan bumi lan terus perang nyekel gunung Sion lan puntuk-puntuké.

⁵Kaya manuk sing mabur ngeblak-ngeblak, ngayomi susuhé, ya mengkono enggoné GUSTI sing ngwasani langit lan bumi bakal ngayomi Yérusalèm, mageri lan ngekèki keslametan, njaga lan ngedohké tyilaka.”

⁶Hé wong Israèl, pada mratobata marang Panjenengané, sing wis kok tinggal nganti adoh!

⁷Lah ing dina kuwi saben wong sak panunggalmu bakal mbuwangi brahala-brahalané slaka lan brahala-brahalané emas sing digawé karo tanganmu déwé karo kebak dosa.

⁸Asyur bakal ambruk karo pedang, nanging duduk pedangé wong, lan bakal dipangan karo pedang nganti resik, nanging duduk pedangé manungsa, lan bakal mblayu nyingkiri pedang, lan wong nom-noman bakal pada dadi batur wajip.

⁹Sing ngayomi bakal entèk awit sangka wedi, lan penggedéné perang bakal kagèt terus mblayu ninggal gendérané, mengkono tembungé GUSTI sing nduwé geni ing Sion lan angklo ing Yérusalèm.