Read Caribbean Javanese Yésaya 32 Bible Online

Yésaya 32 - Caribbean Javanese bible

Yésaya 32

¹Lah bakal ana ratu sing mréntah karo adil, uga para penggedéné bakal mimpin karo jujur,

²lan saben wongé bakal kaya panggonan pangungsèn yèn ana angin lan panggonan pengayoman yèn ana lésus, kaya ilèn-ilèn banyu ing panggonan sing garing, kaya iyupé watu sing gedé ing negara sing ngentak-entak.

³Mripaté wong sing pada weruh bakal ora dimeremaké menèh, lan kupingé wong sing pada krungu bakal nggatèkké.

⁴Atiné wong sing kurang pikiran bakal bisa nimbang, lan ilaté wong sing gagap bakal bisa ngomong tyeta.

⁵Wong bodo ora bakal diarani menèh wong sing mikir luhur, lan wong ngapus ora bakal diarani wong luhur.

⁶Awit wong bodo bakal ngomongké bodoné, lan atiné ngrantyam perkara sing ala, ya kuwi nduwé niat murtad lan ngomongké bab sing nasarké kanggo GUSTI, ora perduli marang wetengé wong kaliren lan marang wong sing ngelak butuh ngombé.

⁷Wong ngapus kuwi akal-akalé ala, sing dirantyam penggawé sing ala kanggo nggawé tyilakané wong sangsara karo tembung-tembungé sing goroh, senajan wong mlarat kuwi mbélani wewenangé.

⁸Nanging wong sing luhur pikirané kuwi ngrantyam bab sing luhur, lan tansah nandangi mengkono.

⁹Hé para wong wadon sing pada urip karo tentrem, pada tangia, rungokna swaraku, hé para botyah wadon sing pada urip karo ayem, pada gatèkna tembungku!

¹⁰Ing sak njeruhné setaun luwih kowé bakal pada gemeter, hé para wong sing pada urip karo tentrem, awit panèné woh anggur wis entèk rusak, lan panèn wowohan liyané uga ora ana.

¹¹Pada gemetera, hé para wong wadon sing pada urip karo ayem, pada gemetera, hé para wong wadon sing pada urip karo tentrem, sèlèhna lan utyulana sandanganmu, pada nganggoa salin kasusahan ing wetengmu!

¹²Pada tangisana kebonmu sing apik, lan witmu anggur sing tansah gembel wohé,

¹³pada tangisana negarané bangsaku sing ketukulan grumbul eri lan suket, malah uga sak kabèhé omahmu, panggonan sing kanggo bungah-bungah ing kuta sing kebak kesenengan.

¹⁴Awit gapuramu wis disuwungké lan raméné kutamu wis malih dadi sepi. Pegunungan lan panggungé wis dadi tanah rata ing sak lawas-lawasé, dadi panggoné kabungahan kimar alas lan pangonané kumpulan kéwan.

¹⁵Nganti kita pada diesoki karo Roh sangka nduwur; ara-ara samun terus dadi kebon wowohan, lan kebon wowohan kuwi bakal dianggep alas.

¹⁶Ing ara-ara samun bakal tansah ana keadilan lan ing kebon wowohan bakal tetep ana kabeneran.

¹⁷Ing ngendi ana kabeneran ing kono bakal ana tentrem rahayu, nanging woh-wohé kabeneran kuwi keayeman lan katentreman kanggo ing sak lawas-lawasé.

¹⁸Bangsaku bakal manggon ing panggonan kerukunan, ing panggonan sing tentrem ing panggonan lèrèn sing aman.

¹⁹Alas bakal rusak babar pisan awit udan ès lan kuta bakal diasorké banget.

²⁰Rahayu kowé sing pada bisa nyebar ing kabèh panggonan sing ana banyu, sing bisa ngetyulké sapiné lan kimaré menyang ngendi-endi!