Read Caribbean Javanese Yésaya 33 Bible Online

Yésaya 33 - Caribbean Javanese bible

Yésaya 33

¹Tyilaka kowé, hé tukang ngrusak sing ora dirusak déwé, lan kowé, hé tukang ngrampok sing ora dirampok déwé! Yèn wis rampung enggonmu ngrusak, kowé déwé bakal dirusak; yèn wis rampung enggonmu ngrampok, kowé déwé bakal dirampok.

²Duh GUSTI, kita supaya Panjenengan welasi, Panjenengan sing kita entèn-entèni! Panjenengan supaya gelem ngayomi kita ing saben ésuk karo tangan Panjenengan, lan kita pada dikèki keslametan ing njeruhné kangèlan!

³Waktu krungu gembruduké swara waktu Panjenengan ngadek, para bangsa pada mblayu lan para taleré bangsa pada buyar.

⁴Wong terus pada nglumpukké sing direbut kaya walang sing nggragas sing mangan pakané; pada ngebyuki kaya tekané walang grombolan.

⁵GUSTI kuwi Mahaluhur, awit manggon ing nduwur; Sion digawé kebak keadilan lan kabeneran.

⁶Jaman tentrem bakal nekani kowé; kasugihan sing ndadèkké slamet kuwi kawityaksanan lan kaweruh; wedi lan ngajèni marang GUSTI, kuwi sing dadi bandané Sion.

⁷Delengen, wong-wong Arièl pada sambat ing dalan, para kongkonan kanggo nggolèki rukunan pada nangis kepati.

⁸Dalan-dalan dadi sepi lan wong ora ana siji waé sing mlaku ing dalan. Perjanjian wis disélaki, para seksi wis pada ditampik, lan manungsa ora digubris.

⁹Negara susah lan nggresah; Libanon kisinan lan ambruk mati; Saron wis kaya ara-ara, Basan lan Karmèl pada brindil.

¹⁰Saiki Aku bakal ngadek - mengkono tembungé GUSTI, - saiki Aku bakal gembrégah ngadek, saiki Aku bakal ngadek jejek!

¹¹Kowé pada meteng suket garing, lan bakal manak damèn; ambekan nesumu kaya geni sing mangan kowé déwé.

¹²Para bangsa bakal pada diobong dadi kapur lan bakal diobong karo geni kaya rerungkutan eri sing dibabati.

¹³Hé para wong sing adoh, pada rungokna kabar bab apa sing wis Tak tindakké, hé para wong sing tyedak, pada ngertènana kekuwatan-Ku!

¹⁴Para wong dosa ing Sion pada kagèt, para wong murtad pada dikwasani karo rasa gemeter. Kuwi pada ngomong: “Sapa ta sing bisa betah manggon ing geni sing ngentèk-entèkké iki? Sapa sing betah manggon ing pawon geni sing langgeng iki?”

¹⁵Wong sing urip ing sak njeruhné kabeneran, sing tembung-tembungé jujur, sing nampik pengasilané, sangka wohé peresan, sing ngipatké tangané supaya aja nampani beselan, sing nutupi kupingé supaya aja krungu rantyamané bab ngutahké getih, sing meremké mripaté, supaya aja weruh sing ala,

¹⁶kuwi kaya wong sing manggon karo tentrem ing panggonané sing duwur, bèntèngé kuwi pager watu ing gunung watu; roti dityawisi, banyu ngombé dityepakké.

¹⁷Kowé bakal ndeleng ratu ing sak njeruhné kamulyané, bakal weruh negara sing amba banget.

¹⁸Ing sak njeruhné atimu kowé bakal mikir marang rasa wedi sing uwis-uwis: “Apa wis ora ana tukang pétung, apa wis ora ana tukang timbang, lan apa wis ora ana wong sing ngitung menara?”

¹⁹Kowé ora bakal weruh menèh bangsa sing ora tata kuwi, bangsa sing tembungé ora tyeta, dadi ora dunung, sing tetembungané gagap, dadi ora ana wong sing bisa ngerti.

²⁰Pada delengen Sion, kutané riyaya kita! Mripatmu bakal ndeleng Yérusalèm, panggonan sing tentrem, tarup sing ora dielih-elih, sing patoké ora bakal dijebol ing selawasé, lan sing dadungé ora bakal pedot.

²¹Ing kono kita bakal weruh sak pira gedéné kamulyané GUSTI kita: kaya panggonan sing kebak kali lan ilèn-ilèn sing amba; kuwi ora bakal diliwati prau, lan kapal gedé ora bakal nyabrang ing kono.

²²Awit GUSTI kuwi Rèkter kita, GUSTI kuwi sing ngekèki angger-angger marang kita; GUSTI kuwi sing ngadek dadi Ratu kita, Panjenengané bakal ngluwari kita.

²³Dadung-dadungmu wis pada kendo, ora kena kanggo nalèni tyagaké layar nganti kentyeng ing panggonané, ora kena kanggo mentèng layar. Ing waktu kuwi wong bakal ngedum-edum sing direbut sing okèh banget, lan wong lumpuh bakal pada ngrayah sing direbut.

²⁴Ora ana wong siji-sijia sing bakal ngomong ing kono: “Aku lara,” lan sak kabèhé wong sing manggon ing kono bakal dikèki ngapura kanggo kesalahané.