Read Caribbean Javanese Yésaya 34 Bible Online

Yésaya 34 - Caribbean Javanese bible

Yésaya 34

¹Hé para bangsa, pada nyedaka, rungokna, lan pada gatèkna, hé para taleré bangsa! Bumi uga sak isiné kabèh apiké pada krungu, uga jagat lan kabèh sing tukul sangka kono.

²Awit GUSTI nesu marang kabèh bangsa, lan panas ing ati awit sangka suradaduné; kuwi wis pada disisihké bakal dientèkké lan dipasrahké supaya pada dibelèh.

³Wong sing mati dipatèni bakal dibuwang, lan batangé bakal pada mambu bosok; gunung-gunung bakal pada kebanjiran getihé.

⁴Sak kabèhé lintang ing langit bakal entèk, lan langit bakal digulung kaya kitab gulungan, kabèh lintangé bakal mati kaya godong sing pada gogrok sangka wit anggur, lan kaya gogroké godong anjir.

⁵Awit pedang-Ku ing langit wis ngamuk, delengen, kuwi wis mudun ngadili Edom, bangsa sing wis Tak dèwèké supaya dientèkké.

⁶GUSTI nduwé pedang sing dlèwèran getih lan gupak gajihé okèh banget, ya kuwi getihé tyempé-tyempé lan wedus-wedusé lanang lan gajihé ginjelé wedus-wedusé gèmbèl lanang. Awit GUSTI nganakké kurban sing dibelèh ing Bosra lan pembelèhan gedé ing negara Edom.

⁷Sapi-sapi alasan bakal pada ambruk mati bebarengan karo sapi-sapi enom karo sapi-sapi lanang sing rosa-rosa, negarané bakal rata kilènan karo getih, lan lemahé kebak gajih.

⁸Awit GUSTI nekakké dina tibané balesan lan taun enggoné nibakké paukuman awit sangka perkarané Sion.

⁹Kali-kaliné Edom bakal malih dadi kali geni, lan lemahé dadi lirang; negarané bakal dadi geni sing murup mulat-mulat.

¹⁰Awan wengi ora bakal mati-mati, kemebulé kemebul sak lawas-lawasé. Negara kuwi bakal dadi ambruk turun-temurun, lan sak terusé ora bakal ana wong sing liwat ing kono.

¹¹Mentok lan landak sing bakal manggon ing kono. Manuk beluk lan gagak bakal manggon ing kono. GUSTI bakal ndadèkké ora nggenah negara kuwi lan didadèkké suwung netepi rantyaman-Né.

¹²Ora ana wong bakal manggon ing kono, lan para penggedéné bakal ora ana menèh; wis ora ana menèh sing bakal diangkat dadi ratu ing kono, lan sak kabèhé ratu wis pada entèk.

¹³Eri grumbul bakal tukul ing gapura-gapurané, lan suket lan eri ing bèntèng-bèntèngé, terus dadi panggonané asu alasan, lan dadi panggonané manuk unta.

¹⁴Kéwan ara-ara samun bakal pada petukan karo asu alas, lan Léwiatan bakal sliweran karo kantyané ing kono; memedi bakal ing kono lan bakal olèh panggonan.

¹⁵Ula wit-witan pada nusuh lan ngendok ing kono lan anggrem nganti endoké pada nètès; manuk beri pada grombolan ing kono, pada jejodoan.

¹⁶Golèkana ing kitabé GUSTI lan diwatya; kabèh sing urip kuwi mau kabèh siji waé ora ana sing kèri, ora ana sing kélangan kantyané; awit mengkono préntahé sing metu sangka tutuké Gusti, lan Rohé Gusti déwé sing nglumpukké kuwi kabèh.

¹⁷Panjenengané déwé wis ngguwak lotré lan ngedum negara kuwi marang para sing urip karo tali ukuran; kabèh sing urip mau bakal manggon ing kono nganti sak lawas-lawasé lan ing kono turun-temurun.