Read Caribbean Javanese Yésaya 38 Bible Online

Yésaya 38 - Caribbean Javanese bible

Yésaya 38

¹Ing waktu semono Hiskia ngalami lara nganti arep mati. Yésaya, anaké Amos terus nemoni lan ngomong: “Mengkéné tembungé GUSTI: Kowé ngekèkana paweling-paweling sing pungkasan marang brayatmu, awit kowé bakal mati, ora bakal waras menèh.”

²Hiskia terus ngénggokké praupané menyang témbok lan ndedonga marang GUSTI,

³tembungé: “Duh GUSTI, Panjenengan supaya gelem éling enggèn kula wis urip ing ngarepé Panjenengan karo setia lan sak kabèhé ati lan enggèn kula wis nindakké apa sing apik ing mripat Panjenengan.” Sakwisé mengkono Hiskia terus nangis karo melas.

⁴GUSTI terus ngetokké tembung marang Yésaya:

⁵“Kowé lungaa lan ngomonga marang Hiskia: Mengkéné tembungé GUSTI, Gusti Allahé Daved, para leluhurmu: Pandongamu wis Tak runggokké lan eluhmu wis Tak sawang. Aku bakal nambahi umurmu limalas taun

⁶lan Aku bakal ngluwari kowé lan kuta iki sangka tangané ratu ing Asyur lan bakal mageri kuta iki.

⁷Iki sing bakal dadi tanda sangka GUSTI kanggo kowé, ya kuwi yèn GUSTI bakal nindakké apa sing wis dijanjèkké.

⁸Lah ayang-ayangé piranti pituduh srengéngé gawéané Akas bakal Tak undurké sepuluh tlapak sangka sing wis diliwati.” Ing kono piranti mau ya terus nduduhké munduré srengéngé sepuluh tlapak sangka sing wis digawé.

⁹Pandongané Hiskia, ratu ing Yéhuda, sakwisé lara lan wis waras, ditulis mengkéné:

¹⁰“Aku iki wis mikir: Umurku ijik separo aku kok kepeksa kudu lunga; ing sak luwihé umurku kuwi aku dityeluk menyang gapurané ndonyané wong mati.

¹¹Aku ngomong: aku ora bakal weruh GUSTI menèh ing negarané wong urip; aku ora bakal weruh wong siji-sijia menèh ing sak tengahé para sing manggon ing ndonya.

¹²Omah sing tak enggoni dibubrah lan mbukak kaya tarupé pangon; kaya tukang tenun sing nggulung tenunané enggonku mungkasi uripku; Panjenengan ngetok nyawaku sangka bolahé urip. Awan nganti wengi Panjenengan péngin ngentèkké uripku.

¹³Aku sambat njaluk tulung nganti ésuk; kaya singa, ya mengkono kuwi enggoné Gusti ngremuk kabèh balungku; awan nganti wengi Panjenengan péngin ngentèkké uripku.

¹⁴Kaya manuk sriti, sing mijah, ya mengkono kuwi enggonku tyat-tyit, swaraku ketekur-ketekur kaya swarané manuk dara. Mripatku kaya-kaya nganti entèk awit sangka enggonku ndangak menduwur, duh Gusti, kula disengsarakké; Panjenengan supaya gelem dadi tanggungan kanggo kula!

¹⁵Apa ta sing bakal tak pasrahké lan tak utyapké ing ngarepé Gusti; apa ora Panjenengané ta sing nandangi mengkono? Aku babar pisan ora bisa turu awit sangka paité kasusahanku kuwi.

¹⁶Duh Gusti, ya awit sangka mengkéné kuwi ati kula ngentèn-entèni marang Panjenengan; Panjenengan supaya gelem nentremaké roh kula, gelem maraské kula, gelem mulihké kula!

¹⁷Kasusahan sing pait kuwi tenan dadi keslametan kula; Panjenengan sing njaga nyawa kula supaya ora ketyemplung ing luwangé karusakan. Awit Panjenengan wis ngguwak kabèh dosa kula nganti adoh sangka ngarepé Panjenengan.

¹⁸Awit ndonyané wong mati ora bisa maturkesuwun marang Panjenengan, lan pati ora bisa ngelem-elem Panjenengan; wong sing pada mudun ing juglangan kuburan ora ngentèn-entèni marang kasetian Panjenengan.

¹⁹Nanging mung wong sing urip, kuwi sing maturkesuwun marang Panjenengan, kaya kula ing dina iki; bapak bakal seneng ngerti bab kasetian Panjenengan marang anak-anaké.

²⁰GUSTI wis teka ngekèki keslametan marang aku! Aku arep pada ngunèkké harep, ing selawasé urip ing griyané GUSTI.”

²¹Yésaya terus ngomong: “Bèn dijikukké kuku woh anjir terus dipopoké ing korèngé, supaya waras!”

²²Sak durungé kuwi Hiskia wis ngomong: “Apa tanda-tandané, yèn kula bakal mlebu ing griyané GUSTI?”