Read Caribbean Javanese Yésaya 40 Bible Online

Yésaya 40 - Caribbean Javanese bible

Yésaya 40

¹Umat-Ku lipuren, ya lipuren, mengkono tembungé Gusti Allahmu,

²atiné Yérusalèm ayemna lan mbengok-mbengoka banter yèn kasusahané wis rampung, yèn kesalahané wis dingapura, awit wis dikèki paukuman karo tangané GUSTI tikel kaping loro awit sangka kabèh dosané.

³ Ana swara sing mbengok: “Tyawiské dalan kanggo GUSTI ing ara-ara samun, lurusna dalan gedé kanggo Gusti Allah kita ing ara-ara samun!

⁴Saben ledokan urukana, lan saben gunung lan puntuk ratakna; lemah sing ana puntuk-puntuké didadèkké lemah rata, lan lemah sing legok geneng didadèkké daratan sing rata;

⁵ing kono kamulyané GUSTI bakal dinyatakké lan umat manungsa kabèh bakal pada weruh kuwi bebarengan; GUSTI piyambak nyata-nyata wis ngomong mengkono!”

⁶Ana swara sing ngomong: “Kowé mbengok-mbengoka banter!” Aku nyauri: “Apa sing kudu kula bengokké nganti banter?” “Umat manungsa kabèh kuwi kaya suket lan kabèh apiké kaya kembang ing ara-ara.

⁷Suket dadi garing, kembang dadi alum, yèn GUSTI nyebul karo napasé. Bangsa kuwi sejatiné kaya suket.

⁸Suket dadi garing, kembang dadi alum, nanging tembungé Gusti Allah kita tetep tekan sak lawas-lawasé.”

⁹Hé Sion, sing nggawa kabar betyik, munggaha menyang gunung sing duwur! Hé Yérusalèm, sing nggawa kabar betyik, bengokna swaramu sing banter, ya bengokna swaramu, aja wedi! Wartakna marang kuta-kuta ing Yéhuda: “Delengen, kuwi Gusti Allahmu!”

¹⁰Delengen, kuwi Gusti GUSTI. Enggoné teka karo kekuwatan lan nggawa pangwasa. Lah kabèh sing dadi upahé rekasané pada nunggal karo Panjenengané; kabèh sing wis dadi duwèké pada mlaku ing ngarepé.

¹¹Kaya pangon Panjenengané enggoné ngengon wedusé, lan kuwi pada diklumpukké karo tangan-Né; tyempéné pada dipangku, baboné pada ketuntun karo ati-ati.

¹²Sapa sing naker banyu segara nganggo èpèk-èpèké lan ngukur langit nganggo kilanané, naker lebuné bumi nganggo takeran, nimbang gunung-gunung nganggo timbangan, utawa puntuk-puntuk nganggo timbangan?

¹³Sapa sing bisa nata Rohé GUSTI utawa ngekèki pinuntun marang Panjenengané kaya juru pituduh?

¹⁴Gusti njupuk pituduh marang sapa supaya nduwé pangertèn, lan sapa sing ngekèki piwulang marang Gusti ing bab nindakké pengadilan, utawa sapa sing ngekèki piwulang bab kaweruh marang Panjenengané lan ngekèki pituduh supaya Panjenengané nandangi karo pangertèn?

¹⁵Para bangsa kuwi sejatiné kaya banyu setètès ing timba lan dianggep kaya awu siji ing timbangan. Puluh-puluh kuwi sejatiné boboté mung kaya awu alus.

¹⁶Libanon kuwi ora tyukup yèn dadi kayu kanggo masak lan kabèh kéwané ora tyukup yèn kanggo kurban obongan.

¹⁷Kabèh bangsa kuwi kaya waé ora ing ngarepan-Né pada dianggep kopong lan tanpa guna.

¹⁸Dadiné Gusti Allah kuwi arep kok padakké karo sapa, lan apa sing kok anggep pada karo Panjenengané?

¹⁹Apa retya? Kuwi dityitak karo tukang wesi, lan dilapis emas karo tukang emas, sing uga nggawakké ranté-ranté slaka.

²⁰Wong sing ngedekké retya kayu, kuwi milih kayu sing ora gelis gapuk, golèk tukang sing pinter kanggo ngedekké retya supaya ora bakal gelis hoyak.

²¹Kowé apa pada ora weruh? Kowé apa pada ora krungu? Apa wiwit ing wiwitan ora dikabarké marang kowé kabèh? Apa kowé ora ngerti wiwit waktu bumi dibangun?

²²Panjenengané sing njagong ing dampar ing sak nduwuré bunderané bumi sing rayaté kaya walang; ya Panjenengané kuwi sing mbèbèr langit kaya mori lan masang kuwi kaya tarup sing dienggoni!

²³Ya Panjenengané kuwi sing ndadèkké para penggedéné pada entèk lan sing ndadèkké para rèkter ing ndonya tanpa guna!

²⁴Ijik waé pada ditandur, ijik waé pada disebar, ijik waé tyangkokané pada metu oyoté ing lemah, wis pada didamoni karo Panjenengané, terus pada garing, lan kabur karo lésus kaya merang.

²⁵Aku iki arep kok padakké karo sapa sing kaya-kaya dadi sak pepadan-Ku? Mengkono tembungé sing Mahasutyi.

²⁶Mripatmu nyawanga menyang langit lan delengen: sapa sing nggawé kabèh lintang-lintangé kuwi lan mréntah metu kabèh suradaduné karo nyeluk jenengé kuwi kabèh? Siji waé ora ana sing ora teka, awit Panjenengané kuwi Mahakwasa lan Mahakuwat.

²⁷Kenèng apa kowé ngomong mengkono, hé Yakub, lan ngomong mengkéné, hé Israèl: “Uripku iki didelikké karo GUSTI, lan wewenangku ora digatèkké karo Gusti Allahku?”

²⁸Apa kowé ora weruh, lan kowé apa ora krungu? GUSTI kuwi Gusti Allah sing langgeng sing nggawé bumi wiwit pojok tekan pojok; Panjenengané ora kesel lan ora lemes, kawityaksanan-Né ora kena dijajaki.

²⁹Panjenengané ngekèki kekuwatan marang sing kesel lan ngekèki tambahé karosan marang sing tanpa kekuwatan.

³⁰Para nom-noman pada dadi kesel lan lemes lan para botyah enom pada kesandung tiba,

³¹nanging wong sing pada ngentèn-entèni marang GUSTI dikèki kekuwatan anyar: pada mabur mumbul kaya manuk garuda karo kekuwatané swiwiné; pada mlayu lan ora nganti lemes, pada mlaku nanging ora kesel.