Read Caribbean Javanese Yésaya 41 Bible Online

Yésaya 41 - Caribbean Javanese bible

Yésaya 41

¹Hé puluh-puluh, pada menenga lan rungokna marang Aku; para bangsa pada olèha kekuwatan anyar! Bèn pada nyedaki lan terus ngomong: Hayuk pada maju bebarengan lan nganakké perkara!

²Sapa sing ngobahké wong sangka wétan, sing ngobahké wong sing saben nandangi mesti menang, sing menangké para bangsa ing ngarepé lan nglorot para ratu? Pedangé njalari para ratu dadi kaya lebu lan panahé ndadèkké kaya merang sing didamoni.

³Terus nguber para ratu mau lan liwat dalan sing durung tau diambah, nanging slamet.

⁴Sapa sing nglakoni lan nindakké kuwi kabèh? Panjenengané, sing wiwit mbiyèn nyeluk para turunané manungsa, Aku, GUSTI, sing ndisik déwé, lan kanggo para wong sing kèri déwé, Aku tetep Panjenengané kuwi uga.

⁵Puluh-puluh pada weruh lan terus wedi, pojok-pojokané bumi pada gemeter; pada teka lan mundak tyedak.

⁶Pada tulung-tinulung lan ngomong marang kantyané: “Atimu sing tatak!”

⁷Pandé wesi nguwatké atiné tukang emas, sing nipiské logam karo palu wesi nguwatké atiné sing nggemblèng ing landesan; terus ngomong marang tukang patri: “Kuwi betyik,” lan garapané terus dikuwatké karo paku, supaya ora gonjang-ganjing.

⁸Nanging kowé, hé Israèl, abdi-Ku, hé Yakub, sing wis Tak pilih, turunané Abraham, kantya-Ku;

⁹kowé sing wis Tak jikuk sangka pojok-pojokané bumi lan sing wis Tak tyeluk sangka pojok-pojoké, Aku ngomong marang kowé: “Kowé kuwi abdi-Ku, kowé wis Tak pilih lan ora Tak tampik”;

¹⁰kowé aja wedi, awit Aku nuntun kowé, kowé aja melung-melung, awit Aku iki Gusti Allahmu. Aku bakal nguwatké, malah bakal mitulungi kowé; Aku bakal nuntun kowé karo tangan-Ku tengen sing njalari menang.

¹¹Lah, sak kabèhé wong sing nesu marang kowé bakal kewirangan lan ngalami sing njijiki; para wong sing nesoni kowé bakal pada kaya waé ora ana lan bakal pada nemu karusakan;

¹²kowé bakal nggolèki wong-wong sing pada nglawan marang kowé, nanging ora bakal ketemu; para wong sing merangi kowé bakal kaya ora ana lan tanpa guna.

¹³Awit Aku iki, GUSTI, Gusti Allahmu, nyekel tanganmu tengen, lan ngomong marang kowé: “Kowé aja wedi, ya Aku iki sing mitulungi kowé.”

¹⁴Kowé aja wedi, hé tyatying Yakub, hé uler Israèl! Ya, Aku iki sing mitulungi kowé, mengkono tembungé GUSTI, lan sing nebus kowé kuwi sing Mahasutyi, Gusti Allahé Israèl.

¹⁵Lah kowé Tak dadèkké piranti kanggo ngrontok sing landep lan anyar, sing ana untuné rong larik; kowé bakal ngrontoki gunung-gunung lan kuwi bakal pada kok remuk, lan puntuk-puntuk ya bakal kok dadèkké kaya kulit gabah,

¹⁶bakal pada kok tapèni lan terus pada kabur karo angin, lan bakal mawut karo lésus. Nanging kowé iki bakal surak-surak awit sangka GUSTI lan nggunggung-nggunggung awit sangka sing Mahasutyi, Gusti Allahé Israèl.

¹⁷Para wong sing sangsara lan sing mlarat ijik pada golèk banyu, nanging ora olèh, ilaté pada garing awit ngelak; nanging Aku GUSTI, bakal nuruti kebutuhané wong-wongé, lan awit ngadek dadi Gusti Allahé Israèl Aku ora bakal négakké wong-wong mau.

¹⁸Aku bakal ndadèkké puntuk-puntuk sing gundul, pada ana kaliné lan tanah rata terus ana sumber-sumberé; Aku bakal ndadèkké ara-ara samun dadi telaga lan lemah garing terus metu banyuné.

¹⁹Aku bakal nandur wit tyemara ing ara-ara samun, wit sirah, wit murad lan wit saitun alas; Aku bakal nggawé tukulé wit beros ing ara-ara samun lan wit berangan lan wit tyemara ing sandingé,

²⁰supaya kabèh wong pada weruh lan ngrumangsani, nggatèkké lan ngerti, yèn tangané GUSTI sing nggawé iki kabèh lan sing Mahasutyi, Gusti Allahé Israèl sing nitahké.

²¹Pada ngajokna perkaranmu, mengkono tembungé GUSTI, omongna pasal-pasalmu, mengkono tembungé Ratuné Yakub.

²²Bèn pada maju lan ngabarké marang kita apa sing bakal kelakon! Ramalan sing mbiyèn kuwi dunungna apa tegesé, supaya aku pada mikir-mikir, utawa bab sing bakal kelakon, kuwi aku pada omongana, supaya aku pada weruh kwasané!

²³Omongna bab-bab sing bakal kelakon sakwisé kuwi, supaya aku pada weruh, yèn kowé kabèh iki nyata allah; pada tumindaka waé, betyik apa ala, supaya aku weruh bebarengan karo nggumun!

²⁴Kowé kabèh kuwi sejatiné kaya ora ana penggawé-penggawému kuwi tanpa isi; wong sing milih kowé kuwi njijiki.

²⁵Aku wis ngobahké wong sangka lor lan kuwi wis teka, Aku wis nyeluk wong kuwi sangka sisih njedulé srengéngé karo nyebut jenengé. Kaya tukang kendi ngiles-ngiles lempung, kaya mengkono enggoné wong kuwi bakal ngidak-idak para sing nyekel pangwasa kaya endut.

²⁶Sapa sing ngekèki weruh bab kuwi wiwit ing wiwitan, dadakan aku terus pada weruh, lan wiwit mbiyèn, dadakan aku terus pada ngomongké: “Apa bener wong kuwi?” Sejatiné ora ana sing ngekèki weruh, ora ana wong sing ngabari ora ana wong sing krungu tembung sak ketyap waé sangka kowé.

²⁷Aku sing disik déwé ngekèki weruh marang Sion, lan Aku terus ngirimké wong menyang Yérusalèm sing nggawa kabar betyik.

²⁸Yèn Aku ndelok mubeng, ora ana wong siji-sijia, lan tunggalé wong kabèh kuwi ora ana sing bisa ngekèki pituduh, utawa sing bisa nyauri yèn Aku takon marang wong-wong kuwi.

²⁹Wong kuwi tenan-tenan kaya pada ora ana, penggawé-pengawéné tanpa isi, retya-retyané tyitakan kuwi angin lan tanpa guna.