Read Caribbean Javanese Yésaya 42 Bible Online

Yésaya 42 - Caribbean Javanese bible

Yésaya 42

¹ Delengen kuwi abdi-Ku sing Tak tuntun, pilihan-Ku sing ndadèkké senengan-Ku. Sing wis Tak wènèhi Roh-Ku, supaya terus nggelarké kabeneran marang para bangsa.

²Kuwi ora bakal mbengok-mbengok utawa mbanterké swarané lan ora bakal ngumbar swara ing dalan-dalan.

³Pring sing semplak mlengkung ora bakal diketok, lan utyeng-utyeng sing melik-melik ora bakal dipatèni, nanging piyambaké bakal nggelarké kabeneran karo setia.

⁴Piyambaké déwé ora bakal semplak lan ora bakal tugel ndingkluk, nganti wis rampung enggoné jejekké kabeneran ing bumi; kabèh puluh-puluh ngarep-arep marang piwulangé.

⁵Mengkéné tembungé Gusti Allah, GUSTI, sing nggawé lan njèrèng langit, sing mbèbèr bumi uga kabèh sing tukul ing kono, sing ngekèki ambekan marang umat manungsa sing manggon ing kono lan sing ngekèki nyawa marang sing pada urip ing kono:

⁶“Aku iki, GUSTI, wis nyeluk kowé supaya nggelarké keslametan, wis nyekel tanganmu; Aku wis ndadèkké kowé lan ngekèkké kowé dadi perjanjian kanggo umat manungsa, dadi pepadang kanggo para bangsa,

⁷supaya melèké mripat sing lamur, ngetokké wong ukuman sangka paukuman lan para wong sing manggon ing pepeteng sangka paukuman.

⁸Aku iki GUSTI, ya kuwi asma-Ku; Aku ora bakal ngekèkké kamulyan-Ku marang wong liyané utawa kaluhuran-Ku marang retya.

⁹Sing mbiyèn dinubuatké saiki wis pada kelakon, bab sing anyar bakal Tak kétokké. Sak durungé bab kuwi kelakon, Tak kabarké marang kowé.”

¹⁰Pada ngidungna kidungan anyar marang GUSTI lan ngluhurna Panjenengané sangka pojokané bumi! Segara bèn gembleger ombaké uga isiné kabèh, lan puluh-puluh uga sing ngenggoni kabèh.

¹¹Ara-ara samun bèn nyuwara banter uga kuta-kutané lan désa-désané sing dienggoni Kedar! Sing ngenggoni gunung watu bèn pada surak-surak, bèn pada mbengok-mbengok sangka putyuké gunung-gunung!

¹²Bèn pada ngekèki kehormatan marang GUSTI, lan pada wartakna bab enggoné ngluhurké Panjenengané ing puluh-puluh.

¹³GUSTI maju perang kaya Pahlawan, kaya suradadu enggoné nggugah semangaté perang; Panjenengané surak-surak, malah mbengok-mbengok, marang para mungsuhé, Panjenengané nduduhké kekendelan-Né.

¹⁴Aku mandek wiwit ing mbiyèn mula, Aku mingkem lan ngempet, saiki Aku njerit kaya wong wadon sing mbayi, Aku menggah-menggah lan menggèh-menggèh.

¹⁵Aku bakal ndadèkké gundulé gunung-gunung lan puntuk-puntuk, lan nggawé alumé sak kabèhé tetukulan; Aku bakal ndadèkké kali-kali pada dadi lemah garing lan nggawé asat garingé telaga-telaga.

¹⁶Aku bakal nuntun para wong lamur ing dalan sing durung tau pada diambah, lan kuwi pada Tak lakokké ing dalan-dalan sing durung weruh. Pepeteng ing ngarepé bakal Tak dadèkké padang, lan tanah sing legok geneng bakal Tak dadèkké tanah rata. Ya kuwi bab sing bakal Tak tibakké marang wong-wong kuwi, lan sing mesti bakal Tak tindakké.

¹⁷Wong sing pada pertyaya marang retya tatahan bakal pada mundur lan kewirangan, ya kuwi para wong sing ngomong marang retya tyitakan: “Panjenengan kuwi allah kita!”

¹⁸Pada rungokna, hé para wong budek pada mandenga lan delengen, hé para wong lamur!

¹⁹Sapa sing lamur yèn duduk tunggalé abdi-Ku, lan sing budek kaya kongkonan-Ku? Sapa sing lamur kaya kongkonan-Ku lan sing budek kaya abdiné GUSTI?

²⁰Kowé weruh perkara okèh, nanging ora nggatèkké, kowé masang kuping, nanging ora krungu.

²¹GUSTI nduwé karep nylametaké gelem ngekèkké piwulangé sing gedé lan mulya;

²²nanging wong kuwi bangsa sing dirayah lan dirampok, kabèh pada dityekel ing guwa-guwa lan didelikké ing omah-omah paukuman; wis pada dadi rebutan lan ora ana sing ngluwari, dadi rampasan lan ora ana sing ngomong: “Balèkna!”

²³Sapa sak panunggalanmu sing gelem ngrungokké marang perkara iki, sing gelem nggatèkké lan ngrungokké kanggo sak terusé?

²⁴Sapa sing ngekèkké Yakub supaya dirampas, lan Israèl marang sing pada ngrayah? Apa kuwi duduk GUSTI? Awit kita wis dosa marang Panjenengané, lan nulak mlaku ing dalan sing diduduhké, lan ora gelem ngrungokké marang piwulangé.

²⁵Mulané Panjenengané terus nibani panasé bebendu-Né lan peperangan sing ngidap-idapi sing nggosongké sangka sak ubengé, senajan mengkono kuwi ora dimangertèni, lan sing ngobong dèwèké, nanging kuwi ora digatèkké.