Read Caribbean Javanese Yésaya 46 Bible Online

Yésaya 46 - Caribbean Javanese bible

Yésaya 46

¹Retya Bèl wis dikalahké, retya Nébo wis diasorké, retya-retyané wis pada dimomotké ing nduwuré kéwan; dimomotké ing nduwuré kéwan-kéwan sing mbiyèn pada kok arak-arak, saiki wis pada ditumpakké dadi momotané kéwan sing kesel,

²sing ora bisa nylametaké momotané kuwi. Retya-retya kuwi diasorké lan dikalahké bebarengan lan terus pada diangkut dadi tawanan.

³“Pada rungokna Aku, hé para turunané Yakub, hé sak kabèhé turunané Israèl sing ijik kèri, hé para wong sing Tak géndong wiwit ing weteng, hé para wong sing Tak géndong wiwit lair.

⁴Nganti kowé tuwa Aku iki tetep Panjenengané lan nganti rambutmu putih Aku nggéndong kowé. Aku wis nandangi mengkono lan gelem terus nanggung kowé; Aku gelem mikul lan nylametaké kowé.

⁵Kowé bakal pada madakké lan mbandingké Aku karo sapa lan kowé njèjèrké Aku karo sapa, nganti terus pada?

⁶Wong ngetokké emas sangka kantongé lan nimbang slaka karo timbangan, terus ngupahi wong dikongkon nggawakké allah nganggo bakal mau, terus disembah-sembah lan uga disujuti!

⁷Kuwi terus ditumpangké ing pundak, dipikul lan dipernahaké ing panggonané; allahé kuwi terus ngadek ing kono ora bisa ngalih sangka panggonané. Senajan dibengok-bengoki karo wong, ora nyauri lan ora bisa ngluwari wong sangka kasusahané.

⁸Kuwi pada élingna lan pada rumangsaa kisinan, pada timbang-timbangen ing sak njeruhné ati, hé para wong sing pada nglawan!

⁹Kowé pada ngélingana lelakon-lelakon mbiyèn sing kedadian dèk jaman mbiyèn, yèn Aku iki Gusti Allah lan ora ana liyané, Aku iki Gusti Allah lan ora ana sing kaya Aku,

¹⁰sing ngekèki weruh wiwit ing wiwitan perkara sing mbésuk bakal kelakon lan wiwit ing jaman mbiyèn apa sing durung kelakon, sing ngomong: putusan-Ku bakal nandangi, lan sak kabèhé karep-Ku bakal kelakon,

¹¹sing nyeluk manuk galak sangka wétan, lan wong sing nindakké putusan-Ku sing asal-usulé sangka negara sing adoh. Aku wis ngomong mengkono lan kuwi bakal Tak tindakké, Aku wis ngrantyam mengkono lan kuwi bakal Tak wujudké.

¹²Pada rungokna Aku, hé para wong gemunggung, para wong sing adoh sangka kabeneran:

¹³Keslametan sing sangka Aku wis tyedak, awit Aku sing nyedekké lan keslametan sing Tak wènèhké ora bakal diendek-endek menèh; Aku bakal ngekèki keslametan ing Sion lan kamulyan-Ku marang Israèl.”