Read Caribbean Javanese Yésaya 47 Bible Online

Yésaya 47 - Caribbean Javanese bible

Yésaya 47

¹Meduna lan lungguha ing lebu, hé prawan, wadon ing Babèl! Lungguha ing lemah tanpa dampar, hé anak wadon Kasdim! Awit kowé ora bakal diarani menèh ayu lan nggemeské.

²Kowé njupuka watu gilingan lan nggilinga glepung, bukaken kudungmu; silakna sarungmu, bukaken pupumu, nyabranga ing kali!

³Bèn wewadimu kétok kebukak lan bèn sing njijiki kétok! Aku bakal nibakké balesan lan ora bakal ngéman wong siji-sijia,

⁴mengkono tembungé Juru Penebus kita, GUSTI sing ngwasani langit lan bumi asmané, Sing Mahasutyi, Gusti Allahé Israèl.

⁵Lungguha karo meneng lan mlebua ing pepeteng, hé anak wadon Kasdim! Awit kowé ora bakal diomongké menèh dadi ratu ing sak nduwuré para kraton.

⁶Aku mbiyèn nesu marang umat-Ku, ngregetké panduman duwèk-Ku, lan Tak pasrahaké ing tanganmu; kowé ora welas marang wong-wong kuwi, malah banget-banget enggonmu ngemoti pasangan sing abot marang wong sing wis tuwa.

⁷Mbiyèn kowé ngomong: “Tetep ing sak lawas-lawasé enggonku ngadek dadi ratu!” Nanging kowé ora éling lan ora mikir marang pungkasané kuwi kabèh.

⁸Mulané iki rungokna, hé wong sing urip seneng-seneng, sing mung jagongan karo ayem, sing ngomong sak njeruhné atimu mengkéné: “Ora ana liyané ing sandingku! Aku ora bakal dadi randa, lan ora bakal entèk turunanku!”

⁹Rong perkara iki bakal nekani kowé, ing sak kedèpé mripat, ing sak njeruhné sedina uga. Kowé bakal dadi randa lan turunanmu bakal entèk babar pisan kuwi bakal nibani kowé, senajan okèh bojo wayuhmu lan tijap banget ngilmu mantramu.

¹⁰Mbiyèn kowé rumangsa slamet ing sak njeruhné penggawé alamu; kowé ngomong: “Ora ana sing weruh aku!” kawityaksananmu lan kaweruhmu kuwi sing nasarké kowé, terus kowé ngomong ing sak njeruhné atimu: “Kejaba aku ora ana liyané!”

¹¹Nanging kowé bakal kena tyilaka, kowé ora bisa nindakké japa-mantramu marang kedadian kuwi; kowé bakal ngalami sangsara, kowé ora bakal bisa nulak kuwi karo pasrah kurban; kowé bakal katekan karusakan dadakan waé, sing ora kok kira babar pisan.

¹²Kowé panggaha waé karo ngantepi kabèh japa-mantramu lan bojo wayuhmu sing okèh kuwi, sing kok endelaké wiwit tyilikmu; mbok menawa kowé saguh nekakké bantuan, mbok menawa kowé bisa ngétokké rasa wedi.

¹³Kowé wis kesel awit sangka okèhé pituduh! Bèn pada maju lan ngluwari kowé wong-wong sing pada nliti kabèh pojoké langit, sing pada mriksa lintang-lintang lan sing saben tanggal nom ngekèki kabar bab apa sing bakal kelakon kanggo kowé!

¹⁴Tenan, wong-wong kuwi kaya damèn sing diobong karo geni; pada ora bisa ngluwari nyawané sangka pangwasané geni; geni kuwi duduk mawa geni kanggo manaské awak, duduk geni kanggo bediangan!

¹⁵Ya kuwi paédahé kanggo kowé para tukang japa-mantramu kuwi, sing wis ngrépoti wiwit tyilikmu; pada senpoyongan menyang kabèh kéblat, ora ana sing bisa ngluwari kowé.