Read Caribbean Javanese Yésaya 50 Bible Online

Yésaya 50 - Caribbean Javanese bible

Yésaya 50

¹Mengkéné tembungé GUSTI: “Endi ta layangé pegatané emakmu tanda-tandané yèn wis Tak tundung? Utawa ana wong sing pada ngutangi Aku apa Aku wis tau ngedol kowé? Apa ora awit sangka kesalahanmu déwé kowé wis pada didol lan awit sangka panerakmu déwé emakmu diusir.

²Kenèng apa waktu Aku teka kok ora ana wong, lan waktu Aku nyeluk kok ora ana sing semaur? Apa menawa tangan-Ku tyupet ora bisa ngluwari, utawa apa Aku ora nduwé kekuwatan kanggo ngluwari? Awit Aku nesu, Aku ngesatké segara, kali-kali Tak dadèkké ara-ara samun; iwak-iwaké pada mambu bosok awit ora ana banyu lan terus pada mati kesatan.

³Langit Tak sandangi penganggo ireng lan Tak kemuli salin kasusahan.”

⁴Gusti GUSTI wis mulangi guneman marang Aku kaya murid, supaya Aku bisa nguwatké wong sing lemes-lemes karo tembung. Saben ésuk kupingku dilandepi ngrungokké kaya murid.

⁵Gusti GUSTI wis mbukakké kupingku lan Aku ora mbangkang, ora ménguh menyang mburi.

⁶Aku masrahaké gegerku marang wong-wong sing pada nggebuki Aku, lan pipiku marang wong sing pada njabuti jénggotku Aku ora nutupi praupanku waktu Aku diisin-isin lan diidoni.

⁷Nanging Gusti GUSTI terus mitulungi Aku; mulané Aku ora kewirangan. Mulané Aku nguwatké atiku kaya kekuwatané gunung watu awit Aku ngerti, yèn ora bakal kewirangan.

⁸Panjenengané sing mbenerké Aku wis tyedak. Sapa sing wani padudon karo Aku? Hayuk pada maju bebarengan! Sapa sing perkaran karo Aku? Kuwi bèn marani Aku!

⁹Gusti GUSTI tenan-tenan mitulungi Aku; sapa sing wani ngarani Aku salah? Lah kuwi kabèh bakal pada dadi èlèk kaya sandangan sing wis lungset; bakal pada dipangan karo rayap.

¹⁰Sapa sak panunggalmu sing wedi lan trésna marang GUSTI lan ngrungokké swarané abdiné? Yèn manggon ing pepeteng lan ora keslorotan ing semlorot, bèn pertyaya marang asmané GUSTI lan njagakké marang Gusti Allahé!

¹¹Lah kowé kabèh sing pada ngurupké geni lan sing pada masang panah murup, pada mlebu ing urupé genimu, lan ing sak tengahé panah-panahé murup sing wis pada kok pasang! Bab kuwi bakal ditibakké marang kowé sangka tangan-Ku; kowé bakal pada lèlèh ing panggonan siksa.