Read Caribbean Javanese Yésaya 52 Bible Online

Yésaya 52 - Caribbean Javanese bible

Yésaya 52

¹Tangia, tangia! Enggonen kekuwatanmu kaya sandangan, hé Sion! Enggonen sandanganmu sing apik, hé Yérusalèm, kuta sing sutyi! Awit ora ana wong sing ora sunat utawa reget, sing bakal mlebu menèh ing njeruhmu.

²Ketapna lebuné sikilmu, tangia, hé Yérusalèm sing diukum! Utyulana tali-tali ing gulumu, hé putri Sion sing diukum!

³Awit mengkéné tembungé GUSTI: Kowé pada didol tanpa bayaran, mulané bakal ditebus tanpa bayaran uga.

⁴Awit mengkéné tembungé Gusti GUSTI: Mbiyèn umat-Ku budal menyang negara Egipte lan dadi wong mantya manggon ing kono, terus dianiaya karo Asyur tanpa sebab.

⁵Nanging saiki apa menèh urusan-Ku ing kéné? Mengkono tembungé GUSTI. Umat-Ku terus diukum mengkono waé. Para sing ngwasani pada sombong[5], mengkono tembungé GUSTI, lan asma-Ku sedina-dina tansah dièlèk-èlèkké.

⁶Awit sangka kuwi umat-Ku bakal kenal marang asma-Ku lan ing waktu kuwi terus bakal pada ngerti, yèn Aku iki Panjenengané sing ngomong, ya iki Aku!

⁷Tenan apik kétoké sangka gunung-gunung tekané sing nggawa kabar, sing ngabarké kabar katentreman sing nggelarké kabar sing betyik, sing nggawa kabar keslametan lan sing ngomong marang Sion: “Gusti Allahmu kuwi ratu!”

⁸Rungokna swarané wong sing pada ngawat-awati kowé: pada surak-suraka bebarengan. Awit pada weruh déwé yèn GUSTI mulih menyang Sion.

⁹Pada bungah-bungaha, pada surak-suraka bebarengan, hé gapurané Yérusalèm! Awit GUSTI wis nglipur umaté, wis nebus Yérusalèm.

¹⁰GUSTI wis ngétokké tangané sing sutyi ing ngarepé mripaté kabèh bangsa; pojok-pojokané bumi kabèh terus weruh keslametan sing tekané sangka Gusti Allah kita.

¹¹Ngedohana, ngedohana! Metua sangka kono! Kowé kedemok sing reget! Pada metua sangka sak tengahé, pada sutyèkna uripmu, hé para wong sing pada ngusungi piranti sutyiné GUSTI!

¹²Lah enggonmu pada metu bakal ora karo kesusu lan ora bakal kaya wong mblayu, awit GUSTI bakal mlaku ing ngarepmu, lan Gusti Allahé Israèl bakal dadi penutupé barisanmu.

¹³Lah abdi-Ku bakal olèh nggawé, bakal diluhurké lan dimulyakaké.

¹⁴Kaya enggoné wong okèh bakal pada delek-delek weruh Panjenengané awit sangka bangeté rusaké praupané, nganti ora kaya manungsa menèh, lan kétok ora kaya anak-anaké manungsa menèh, -

¹⁵mengkono enggoné Panjenengané nggawé nggumuné bangsa okèh, para ratu bakal pada mingkem weruh Panjenengané; awit apa sing durung dikabarké, bakal dikétokké, lan apa sing durung dikrungu, bakal dingertèni.