Read Caribbean Javanese Yésaya 53 Bible Online

Yésaya 53 - Caribbean Javanese bible

Yésaya 53

¹Sapa sing ngandel marang kabar sing kita krungu, lan marang sapa tangané GUSTI sing kwasa kuwi dinyatakké?

²Panjenengané kuwi tukul kaya trubusan ing ngarepé Gusti, lan kaya oyot sing tukul sangka lemah garing. Ora ngganteng rupané lan ora nduwé sing apik sing njalari kita terus pada nyawang, lan ora nduwé rupa, sing ménginaké kita.

³Panjenengané dianggep asor lan disingkiri karo wong, sakwijiné wong lanang sing uripé kebak kasangsarané lan kulina ngalami lara; banget enggoné dirèmèhké, nganti wong pada nutupi praupané ing ngarepé lan senajan kanggo kita Panjenengané kuwi ya ora klebu itungan.

⁴Nanging sejatiné lara kita sing ditanggung lan kasangsarané kita sing dipikul, senajan mengkono kita pada ngira Panjenengané kuwi kena bebendu, digebuk lan ditindes karo Gusti Allah.

⁵Nanging Panjenengané kuwi disuduk awit sangka kita pada mbruntak, Panjenengané diremuk awit sangka ala kita; ganjaran paukuman sing nekakké keslametan kanggo kita kuwi ditibakké ing Panjenengané, lan awit sangka bilur-biluré kita terus pada dadi waras.

⁶Kita pada nglembara kaya wedus gèmbèl, déwé-déwé sing kita mlaku, nanging GUSTI numpukké kabèh ala kita marang Panjenengané.

⁷ Panjenengané dianiaya, nanging meneng waé sak njeruhné ditindes kuwi lan ora mbukak tutuké kaya tyempé sing ketuntun menyang pembelèhan; kaya wedus gèmbèl sing ora nyuwara ing ngarepé para wong sing pada ngguntingi wuluné, kaya mengkono enggoné ora mbukak tutuké.

⁸Sakwisé dityekel lan diukum Panjenengané terus dijikuk, lan sapa sing mikir marang nasipé? Panjenengané tenan wis pedot sangka negarané para wong urip, lan awit sangka dosa-dosa umat-Ku Panjenengané kena ing bebendu.

⁹Kuburané dipapanaké ing sak tengahé para wong duraka, lan enggoné mati ing sak tengahé para wong sugih, senajan Panjenengané ora nindakké pilara lan tutuké ora kanggonan goroh.

¹⁰Nanging GUSTI gelem ngremuk lan nggawé kelara-lara Panjenengané. Yèn Panjenengané wis masrahaké piyambaké kanggo kurban tebusané dosa, bakal weruh tyedak turunané, umuré bakal dawa, lan karepé GUSTI bakal kelakon karo Piyambaké.

¹¹Sakwisé nyawané ngalami kasusahan Panjenengané bakal weruh pepadang[6] nganti warek; lan abdi-Ku kuwi, wong bener, bakal mbenerké wong okèh karo kawityaksanané, lan mikul penggawé alané wong-wong mau.

¹²Awit sangka kuwi bakal Tak wènèhi panduman wong-wong sing luhur kanggo bandangan, lan bakal nampa wong-wong sing kuwat kanggo barang rayahan, ya kuwi pametuné enggoné wis masrahaké nyawané marang pati lan awit sangka enggoné klebu wong mbruntak, senajan Panjenengané nanggung dosané wong okèh lan ndongakké para wong sing nglawan.