Read Caribbean Javanese Yésaya 55 Bible Online

Yésaya 55 - Caribbean Javanese bible

Yésaya 55

¹Hé sak kabèhé wong sing ngelak, pada mrénéa lan ngombéa banyu, uga kowé sing ora nduwé duwit, mrénéa! Nampanana pangan tanpa bayar lan mangana, uga anggur lan mèlek tanpa bayar!

²Kenèng apa kowé pada ngetokké duwit ora kanggo tuku roti, lan upahé rekasamu ora kanggo tuku barang sing mareki? Pada rungokna marang Aku, nganti kowé bakal pada mangan pangan sing betyik lan kowé bakal pada ngrasakaké énaké tyetyawisan sing énak déwé.

³Pada ngrungokna kupingmu lan tekaa ing ngarep-Ku; pada rungokna, nganti kowé bakal pada urip! Aku arep nganakké perjanjian sing langgeng karo kowé kabèh, miturut kawelasan sing kuwat sing Tak janjèkké marang Daved.

⁴Lah dèwèké wis Tak tetepké dadi seksi kanggo para bangsa, dadi ratu lan nyekel pemrintahan kanggo para taleré bangsa;

⁵lah kowé bakal ngundang bangsa sing kowé durung kenal, lan bangsa sing durung kenal karo kowé bakal mblayu marani kowé, awit sangka GUSTI, Gusti Allahmu, lan awit sangka sing Mahasutyi, Gusti Allahé Israèl, sing ngekèki kamulyan marang kowé.

⁶Pada nggolèkana GUSTI pumpung ijik gelem ditekani; pada sambata marang Panjenengané pumpung ijik tyedak!

⁷Wong duraka bèn ninggal dalané, lan wong ala bèn ninggal rantyamané; bèn mratobat marang GUSTI, mesti bakal dikèki kawelasan, lan marang Gusti Allah kita, awit Panjenengané bakal nerusaké pangapuran-Né

⁸Awit rantyaman-Ku kuwi duduk rantyamanmu, lan dalanmu kuwi duduk dalan-Ku, mengkono tembungé GUSTI.

⁹Awit sak pira duwuré langit sangka bumi, ya semono duwuré dalan-Ku sangka dalanmu lan rantyaman-Ku karo rantyamanmu.

¹⁰Awit kaya udan lan salju enggoné mudun sangka langit lan ora bali mrana, nanging terus mbanyoni bumi, nggawé suburé lan njalari tukulé tetukulan, ngekèki wiji marang sing nyebar lan roti marang wong sing gelem mangan,

¹¹ya mengkono tembung-Ku sing metu sangka tutuk-Ku: ora bakal bali marang Aku karo nglentung, nanging kuwi bakal nindakké apa sing Tak karepaké, lan bakal olèh gawé kanggo apa waé sing Tak omongké.

¹²Lah kowé bakal pada budal karo bungah lan bakal diteraké karo tentrem; gunung-gunung lan puntuk-puntuk bakal pada seneng lan surak-surak ing ngarepmu, lan kabèh wit-witan ing ara-ara bakal keplok-keplok.

¹³Kanggo gantiné grumbul eri bakal tukul wit beros, lan kanggo gantiné ketyubung bakal tukul wit murad; kuwi bakal kelakon awit sing njalari kaluhurané GUSTI, kanggo tanda langgeng sing ora bakal entèk.