Read Caribbean Javanese Yésaya 58 Bible Online

Yésaya 58 - Caribbean Javanese bible

Yésaya 58

¹Mbengok-mbengoka sing banter, aja ngempet swara! Banterna swaramu kaya trompèt, kabarna marang umat-Ku paneraké lan marang para turunané Yakub dosané!

²Pantyèn saben dina pada nggolèki Aku lan seneng weruh kabèh dalan-Ku. Kaya bangsa sing nglakoni sing bener lan sing ora ninggal angger-anggeré Gusti Allahé pada ngomong takon marang Aku bab angger-angger sing bener, pada seneng nyedek ing ngarepé Gusti Allah, lan ngekèki pitakon:

³“Apa sebabé kula pada pasa Panjenengan kok uga ora nggatèkké? Apa sebabé kula pada ngasorké awak Panjenengan kok ora gelem ngertèni?” Ing waktu kowé pasa nyatané kowé ijik tetep ngurus urusanmu, lan kowé pada nglarani kabèh buruhmu.

⁴Sejatiné enggonmu pada pasa kuwi karo padu lan tukaran lan karo ngantemi tanpa melas. Yèn enggonmu pasa kaya saiki iki swaramu bakal ora dirungokké sangka nduwur.

⁵Lah apa pasa sing kaya mengkéné iki sing Tak karepaké, lan nganakké dina kanggo ngasorké awak, yèn kowé ndingkluk kaya glagah lan njèrèng salin kasusahan lan awu kowé engguh lèmèk turu? Apa kuwi sing kok arani pasa, nganakké dina sing dadi senengé GUSTI?

⁶Duduk! Pasa sing Tak karepaké kuwi, ya kuwi yèn kowé ngutyuli tali-taliné tukang nyia-nyia lan ngudari tali-taliné pasangan, yèn kowé ngluwari wong sing dianiaya lan nugeli kabèh pasangan,

⁷yèn kowé nyuwil-nyuwil rotimu kanggo wong kaliren lan ngajak menyang omahmu wong sing ora nduwé omah, lan yèn kowé weruh wong sing wuda, terus kok wènèhi sandangan lan ora ndelik sangka sedulurmu déwé!

⁸Yèn mengkono pepadangmu bakal njedul kaya ésuk wétan lan tatumu bakal gelis waras; kabeneran bakal dadi barisan ing ngarepmu lan kamulyané GUSTI dadi barisan ing mburimu.

⁹Ing kono yèn kowé ngomong, GUSTI bakal nyauri yèn kowé sambat njaluk tulung, Panjenengané bakal ngomong: Aku ing kéné! Yèn kowé ora masang pasangan menèh marang sak pepadamu lan ora nuding-nuding marang wong karo driji lan ngarani ora-ora,

¹⁰yèn kowé ngekèki wong kaliren apa sing kowé déwé arep lan nggawé senengé atiné wong sing ditindes, pepadangmu bakal semlorot ing pepeteng lan pepetengmu bakal kaya wayah tengah awan.

¹¹GUSTI bakal tansah nuntun kowé lan bakal nggawé maremé atimu ing tanah sing garing lan bakal nganyaraké kekuwatanmu; kowé bakal kaya taman sing disirami karo betyik lan kaya sumber sing ora tau nggawé gela.

¹²Kowé bakal mbangun gempuran sing wis maabad-abad, lan bakal ndandani dasaré sing wis dipasang pirang-pirang turunan. Kowé bakal disebut “sing ndandani témbok sing jebol”, “sing ndandani dalan supaya panggonan kono kena dienggoni”.

¹³Yèn kowé ora sembrana marang pernatané sabat lan ora nindakké penggawéanmu ing dina-Ku sing sutyi; yèn kowé ngarani dina sabat “dina sing énak”, lan dinané GUSTI sing sutyi “dina sing mulya”; yèn kowé ngajèni dina kuwi karo ora nindakké kabèh penggawéanmu lan ora ngurus urusanmu utawa ora omong-omong sing tanpa guna,

¹⁴kowé bakal seneng-seneng awit sangka GUSTI, lan Aku bakal nggawé kowé bisa ngliwati puntuk-puntuk ing bumi karo tumpakan kemenangan; kowé bakal Tak wènèhi pangan sangka warisané leluhurmu Yakub, awit mengkono tembungé tutuké GUSTI.