Read Caribbean Javanese Yésaya 6 Bible Online

Yésaya 6 - Caribbean Javanese bible

Yésaya 6

¹Ing sak njeruhné taun matiné Uzia aku weruh Gusti njagong ing dampar sing duwur lan metongol munggah lan pojokané jubahé ngebeki Griya Sutyi.

²Para Serafim pada ngadek ngubengi Panjenengané, siji-sijiné pada nduwé suwiwi enem; suwiwiné loro kanggo nutupi praupané, loro kanggo nutupi sikilé lan loro kanggo mabur.

³Kuwi pada mbengok saur-sauran, tembungé: “Sutyi, sutyi, sutyi GUSTI sing ngwasani langit lan bumi, sak lumahé bumi kebak karo kamulyan-Né!”

⁴Dasaré kusèné lawang pada gonjang-ganjing awit sangka swara bengokan kuwi, lan griya mau terus kebak karo kebul.

⁵Aku terus ngomong: “Tyilaka aku! Aku mati! Awit aku iki wong sing nduwé lambé reget, lan manggon ing sak tengahé bangsa sing reget lambéné, nanging mripatku wis weruh sang Ratu, ya kuwi GUSTI sing ngwasani langit lan bumi.”

⁶Nanging para Serafim mau ana siji sing terus mabur marani aku; tangané nyekel mawa geni, sing dijukuk nganggo japitan sangka sak nduwuré mesbèh.

⁷Mawa geni kuwi disénggolké ing tutukku karo ngomong mengkéné: “Delengen, iki wis nggepok lambému, dadiné kesalahanmu wis diresiki lan dosamu wis dingapura.”

⁸Aku terus krungu swarané Gusti Allah sing ngomong: “Sapa sing bakal Tak utus, lan sapa sing gelem budal dadi kongkonan-Ku?” Aku terus ngomong: “Iki kula, supaya Panjenengan gelem ngutus kula!”

⁹Sakwisé mengkono Panjenengané ngomong: “Kowé lungaa lan bangsa iki warahana mengkéné: Rungokna sing tenan, nanging ora ngerti! Delengen sing tenan, nanging ora weruh!

¹⁰Atiné bangsa iki gawénen atos lan kupingé kok dadèkna budek lan mripaté gawénen merem kelèt, supaya aja pada bisa weruh karo mripaté lan krungu karo kupingé lan mangertèni karo atiné, terus mratobat lan dadi waras.”

¹¹Aku terus takon: “Nganti pira suwéné kuwi, duh Gusti Allah?” Semauré: “Nganti kuta-kuta wis sepi mamring, ora ana sing ngenggoni menèh, lan ing omah-omah wis ora ana manungsané menèh lan tanahé dadi sepi lan mamring.

¹²GUSTI bakal nyingkirké manungsa nganti adoh banget, nganti arep dadi suwung babar pisan negara kuwi.

¹³Lan yèn ing kono ijik ana turahé sak prasepuluh, kuwi kudu kena tyilaka sepisan engkas nanging kahanané bakal kaya wit terbantin lan wit élon sing tunggaké ijik sakwisé ditegor. Lan tunggak kuwi bakal ngetokké trubusan sing sutyi!”